NIADTONG Sabado, nakaingon ko nga sa akong kinabuhi, I have come full circle.
Matod pa sa diksyonaryo: Full circle, adverb: through a series of developments that lead back to the original source, position, or situation, or to a complete reversal of the original position - usually used in the phrase “come full circle.”
Kana ganing bisag asa na ka gipadpad sa kapalaran, mobalik ra gihapon ka sa imong gigikanan? Kana ganing sa kadaghan na sa imong uyab, kamo ra diay gihapon sa imong first love? Kana ganing sa kataas sa prosesyon, sa simbahan ra gihapon padulong?
Kana ganing sige kag pabadlong sa imong mama sa una, ug karon ikaw na sab ang mama?
Niadtong Sabado, ako ug akong asawa, among gihatod ang among otso anyos sa usa ka bar dinhi sa syudad kay duna siyay gig. Nag-eskuyla ni siyag drums, ug kon naay oportunidad nga among makit-an nga pwede siyang makatukar, amo siyang patukaron. Amo ni siyang gisuportaan sa iyang mga kabuang.
Ug samtang nag-drive mi padung sa bar, ang otso anyos naglingkod sa luyo naghapak-hapak sa iyang drum sticks, nakaingon ko sa akong asawa, “Oh my God, I have come full circle.” Ug nangatawa ming duha.
Nakinumdom ko atong nagsugod kog banda pag first year high school sa among lungsod sa Pinamungajan. Bisan tuod may kahadlok akong inahan ining banda-banda (mga nagbanda mga palainom, adik-adik, tag-as og buhok, way kaligo), misuporta gihapon siya nako.
Bisan sa iyang kabalaka sa akong seguridad, sugtan gihapon ko niya nga moadto’s pikas lungsod aron mosalmot og band competition bisag gabiing dako.
Hangtod nga naabot ang panahon nga nagkasabot mi sa banda nga manukar sa syudad sa Sugbo.
Niadtong panahona, kon moadto kag syudad, mora na og moadto kag laing planeta. Pwerteng layoa paminawon ang syudad, labi na namo nga nagtubo sa probinsya. Ug karon, moadto na mig syudad kay manukar.
“Pag-amping baya didto ha,” giingnan ko ni mama dihang nag-atang na mig bus padung syudad. Gidunolan ko niyag kwarta ug miingon, “Ayaw nag ipalit og beer ha.”
“Tatay, where’s my TF?” gipangutana ko sa akong otso anyos human sa iyang tukar niadtong Sabado.
“Your what?” nangutana ko.
“TF ba, talent fee,” ingon siya.
Ug ambot ngano nga mikuot ra pud dayon ko sa akong pitaka ug ako siyang gidunolan og P100. “Ayaw nag ipalit og beer ha,” ako siyang giingnan.
Dayon mihunghong ko sa akong asawa, “I hate full circles.” Ug nangatawa ming duha.