NAGLUMBA ang mga magbabalaod sa Senado ug sa House of Representatives kon si kinsa kanila ang unang maka-file og mga balaudnon gikan niadtong Lunes, Hulyo 1, sa di pa mobukas ang sesyon sa 18th Congress karong Hulyo 22.
Sa House of Representatives, nag-una ang Sugbuanong magbabalaod, si Kongresista Raul del Mar nga na-reelected sa Cebu City north district sa miaging eleksyon. Ni-file si Del Mar og upat ka balaudnon, ang House Bill (HB) 11, 12, 13 ug 14.
Ang HB 11 magmugna sa Mega Cebu Development Authority (MCDA) nga maoy tahasan sa socio-economic growth ug sustainable development sa Metro Cebu ug sa tibuok lalawigan sa Sugbo ubos sa Mega Cebu 2050 vision. Una kining gi-file ni Del Mar sa 16th Congress, dayon sa 17th Congress, apan wa mapasar.
Ang HB 12, ang proposed “Freedom of Information Act,” gitumong sa paghatag sa mga lungsuranon og access sa mga official records, dokumento ug mga papeles mahitungod sa mga opisyal nga kalihokan sa gobyerno, transaksyon o desisyon ug mga government research data nga gibasihan sa policy development.
Usa ka version sa maong balaudnon gipasar sa third and final reading sa House ug sa Senado sa 14th Congress ug naaprobahan sa bicameral conference committee. Naratipikahan kini sa Senado apan pakyas ang House tungod ckay way quorum.
Ang HB 13, ang proposed “Motocycles-for-Hire Act,” mag-amendar sa Republic Act 4136, ang “Land Transportation and Traffic Code,” aron mahimong legal ang paggamit sa mga motorsiklo isip mga public utility vehicles.
Unang gi-file ni Del Mar ang maong balaudnon sa 17th Congress. Susamang mga balaudnon gi-file sa 15th Congress nila ni kanhi kongresista Pedro Acharon Jr. sa South Cotabato ug Pastor Alcover Jr. sa Anad Partylist.
Si Del Mar niingon nga ang maong balaudnon motubag sa pangihanglan sa kaluwasan ug kaayohan sa mga sumasakay sa mga motorcycles-for-hire nga gitawag nga habal-habal o angkas.
Gitumong usab kini pagseguro nga ang mga operator ug driver sa motorcycle-for-hire maoy responsable niadtong magdanghag sa operasyon sa ilang motorsiklo ug aron di abusaran ug magpalabi pagpasaka sa pletihan ang mga tag-iya, operator ug driver niini.
Samtang ang HB 14 nagtinguha nga matukod ang usa ka light rail transport (LRT) system, metro rail transport (MRT) system o monorail transport system o kaha usa ka modernong mass transport system sa Cebu City ug Metro Cebu.
Matod pa ni del Mar gitumong ang maong proyekto sa pagsulbad sa kahuot sa trapiko nga gipaabot nga mosamot pag kahuot sa umaabot nga mga katuigan tungod sa pagsulbong sa ekonomiya, migration ug labi pa sa populasyon sa Metro Cebu. (edbarrita@gmail.com)