GIKWESTIYON ni Atty. Elvira Cruz ang pagbutang ni Bureau of Customs (BOC) Commissioner Rey Leonardo Guerrero og laing district collector sa Port of Cebu human gihulagway ni Cruz nga illegal kini.
Niadto lang Lunes dihang gitudlo si Atty. Charlito Martin Mendoza isip acting district collector sa Port of Cebu diin gibutyag ni Cruz nga wala na siya pasudla sa maong buhatan tungod kay gibabagan siya sa mga armed Coast Guard personnel.
Tungod niini, midangop sa Court of Appeals, Ombudsman ug ubang buhatan sa gobyerno ang grupo ni Cruz aron mangayo og katin-awan, ingon man nga sundon sa BOC ang nakalagda sa Civil Service Commission (CSC) nga dili mamahimong ipatuman ang reassignment kon aduna'y appeal nga gisang-at kabahin niini.
Abril ning tuiga dihang nakadawat si Cruz og Customs personnel order diin nag-reassign kaniya isip Compliance Monitoring unit gikan sa pagka-district collector sa Port of Cebu.
Si Atty. Lemuel Erwin Romero ang gitudlo isip officer-in-charge sa Port of Cebu niadtong maong reassignment.
Apan si Cruz mi-appeal niini ug matod sa CSC magpabilin siya sa iyang pwesto karon nga pending pa ang appeal.
Matod sa legal ni Cruz nga si Atty. Zeus Librojo nga usurpation kining gihimo sa commissioner sa iyang kliyente.
Dugang ni Librojo nga nangayo na sila karon og tabang sa korte aron hunongon ang gihimo karon nga illegal nga pag-ilis kang Cruz isip district collector sa Port of Cebu.
Apan si Mendonza sa iyang bahin niklaro nga dili illegal ang iyang pag-asumir sa maong posisyon.
Si Mendoza miatubang sa mga sakop sa Cebu media aron ipakita ang iyang Customs Personnel Order (CPO) B-55-2019 dated 13 June 2019 nga naglatid sa iyang designation isip bag-ong acting district collector.
Gani, iyang gihulipan ang OIC district collector nga si Romero nga temporaryong mihupot sa katungdanan sukad nga girelibuhan si kanhi district collector nga si Cruz niadtong buwan sa Abril.
Dugang ni Mendoza nga wala sila’y kalapasan nga nahimo sanglit hagbay ra nga narelibuhan sa katungdanan si Cruz.
Samtang giklaro sa Philippine Coast Guard (PCG) Central Visayas nga dili tinuod ang pasangil nga aduna’y militarisasyon sud sa buhatan sa BOC-Port of Cebu.
Si Lieutenant Junior Grade Michael John Encina, ang tigpamaba sa PCG-Central Visayas, mitataw nga ang nakita nga upat ka personnel niini dinha sa pasilidad sa Port of Cebu kay kabahin sa giugmad nga Task Force Aduana diin sila gitahasan sa seguridad niini. (HBL)