GIKUWESTIYON ni Lapu-Lapu City Mayor Junard “Ahong” Chan ang ordinansa nga gisandigan ni Congresswoman Paz Radaza sa iyang padayong pag-ukopar sa iyang buhatan sa ikaduhang andana sa Lapu-Lapu City Hall.
Ang naasoyng buhatan gustong gamiton ni Chan isip iyang temporaryong opisina hinungdan nga kinahanglan nga mopahawa na si Radaza sa naasoyng buhatan, apan wala namumbaling ang kongresista.
Unang giawhag ni Radaza si Chan nga ipausab sa konseho ang naasoyng ordinansa kung gusto kini nga dili siya mag opisina sa city hall.
Matod ni Chan, dili pa mahulog nga epektibo ang ordinansa nga gisandigan ni Radaza sanglit nasuta nila nga wala pa kini ma publikar sa mga mantalaan human kini napasar sa konseho sa dakbayan niadtong Hunyo 18, 2019.
Nalatid unta sa ordinansa ang pagpagamit sa kongresista sa naasoyng buhatan lakip na ang paggamit og tubig, kuryenti ug internet.
Wala hinuon direktang mokomento si Chan kun bukas ba siya sa pakig dialogue ni Radaza sa higayon nga moabot na kini karong adlawa, Hulyo 4, subay sa sugyot ni Lapu-Lapu City Director Police Colonel Limuel Obon aron mahilot ang kasungian.
Nunot niini, gipahimangnoan ni Chan ang staff ni Radaza sa pag bakante na usab sa naasoyng buhatan sulod ning semanaha.
Ang naasoyng lugway mao nay pinakadugay nga gihatag ni Chan sa staff ni Radaza ug naglaom nga mas maayong tumanon na kini nila sanglit ang gisandigan nilang ordinansa depektoso.
Nasayran nga napaubos na sa inventory sa General Services Office GSO ang mga kabtangan sa naasoyng buhatan nga gisaksihan sa mga sakop sa Lapu-Lapu City Police Office (LCPO) sanglit giingong nagsagol ang gobyerno ug personal nga kabtangan sa nahisgotang buhatan.
Kagahapong adlawa aduna untay pipila ka mga nagpailang supporter ni Chan ang nag-rally sa gawas sa city hall nga nag-awhag ni Radaza sa pagbakante na sa iyang buhatan apan giklaro ni Chan wala siyay kasayuran kalabot niini.
“Kita as much as possible dili ta gusto nga mag pinwersahay ta subay lang ta sa lagda sa balaod nakita na nila nga ilang gigunitang baraha nga ordinansa depektoso so mohawa na lang gyud sila“ pagpasabot ni Chan.
Si Franco Limpangog, Sangguniang Panlungsod (SP) Secretary, nga nahinabi ning mantalaan miangkon nga wala pa mapublikar ang naasoyng ordinansa sanglit gikatakda pa kini nga ipaubos sa bidding kun kinsa ang mo publikar niini.
Idungan ra usab ang naasoyng ordinansa sa uban nga ordinansa nga napanday sa konseho sanglit dili man usab mahimo ug tagsa-tagsa ang ilang pag publikar niini.
Giangkon hinuon ni Limpangog nga nalatid sa ordinansa nga epektibo kini human ma aprobahi sa konseho ug dili epektibo human ma-publikar.
“The ordinance itself take effect upon approval the publication is only one requirements kay di man ta ka publish ug e-single out,” pagpasabot ni Limpangog.
Ang chief of staff ni Radaza nga si Atty Yuri Beluan nga nahinabi ning mantalaan una na usab nga mibutyag nga mopahawa lang gayud sila sa buhatan kun ugaling adunay court order. (GCM)