KAPIN sa P3.3 million nga balor sa illegal nga drugas nasakmit sa kapulisan sa siyudad sa Sugbo sa managlahing anti drug operations, Martes sa gabii, Hulyo 2, ug kaadlawon sa Miyerkules, Hulyo 3.
Usa sa mga dinakpan menor de edad nga mabdos og tulo ka buwan.
Unang nasikop alas 11:30 gabii, Hulyo 2 sa Osmena Drive Tres de Abril st., Barangay Labangon, Siyudad sa Sugbo mao ang 17 anyos nga dalata human makuhai og 180 gramos nga gituohang shabu.
Ang mga sakop sa City Drug Enforcement Unit CCPO nga gipangulohan ni Police Lieutenant Joffre Grande nakadawat og kasayuran labot sa illegal nga negosyo Anna (di tinuod nga ngan).
Tungod sa maong impormasyon, ila dayon nga gihimo ang buy bust operation nga niresulta sa pagka sikop niini, lakip na ang mga pinakete sa illegal nga drugas nga mobalor sa P1.2 million.
Giingong naa sa sulod sa City Jail ang motawag kaniya nga adunay ihatod nga supply sa illegal nga drugas.
“Sa among pagpakighinabi sa suspetsado among nahibaw-an nga ang iyang contact naa sa sulod sa City Jail. So, ang iyang amo naa sa sulod siya lang ang usa sa suplayan. Unya siya ang maoy modala sa mga butang ug mo dispose sa laing mamalitay sa siyudad sa Sugbo,” matod ni Police Captain Arieza Otida.
Wa lang una nganli sa kapulisan kinsa ang drug personality nga naa sa sulod sa bilanggoan nga nagpadayon sa illegal nga kalihukan alang sa mga follow up operation nga himuon.
Lain nasikop
Pagka alas 3:20 sa kaadlawon, ang Pardo police station nakasikop usab og 19 anyos nga drug pusher nga gipangulohan ni Police Major Regino Maramag sa N. Bacalso avenue, Barangay Kinasang-an Pardo, Siyudad sa Sugbo.
Ang nasikop giila nga si Harold Vanzuela, taga Balaga street, Barangay Labangon.
Siya nakuhaan og 215 gramos nga gituohang shabu nga mokantidad og P1.4 million.
Matod ni Maramag nga migawas ang ngalan ni Vanzuela sa dihang aduna silay nadakpan usa ka buwan na ang nakalabay.
Human gitug-an ni Vanzuela kinsa ang iyang kuhaan sa drugas, nihimo na usab silag follow up operation nga miresulta sa pagkasikop ni Joana Nadela, 27, taga N. Bacalso avenue, Barangay Bulacao .
Nakuhaan siyag mga pinakete sa gituohang shabu nga motimbang og 100 grams nga mokantidad sa P680,000. (AYB)