WALA tay nadungog sa nakalabay nga mga adlaw ug bulan nga naghandom si Congressman Isidro Ungab nga mahimong speaker sa Congress tungod sa ligdong ug dili akop-akopon nga kinaiya niini.
Apan sa pagkaguliyang sa pipila ka mga miyembro sa kongreso tungod sa handom nga mahimong hawod ug speaker nga posibleng mahimong pabilo sa pagka bungkag sa ilang panag-uban ubos sa liderato ni President Rodrigo Duterte.
Mitumaw ang maayong panglantaw ni HNP Founder Mayor Sara Duterte-Carpio nga iduso si Congressman Sid Ungab sa ikatulo nga distrito sa dakbayan sa Davao.
Sa bahin ni Mayor Sara, si Ungab angay maoy mahimong speaker tungod duna na siyay kasinatian sa dagan sa Congress.
Si Ungab mikupot sa duha ka dagkong committee sa Congress ug limpyo ang iyang pangalan butang nga misalig si Mayor Inday.
Kaya ni Ungab ang trabaho sa pagka-speaker ug ihatag sa mga nagailog sa pwesto ang mga sensitibo ug dagko nga mga komitiba aron pagsalbar nga mabungkag ang ilang panag hugpong.
Gani man si 1st District Representative Paolo Duterte nakaingon nalang nga magpapili siya kay daw nagkadako ang bikil sa mga Kongresista.
Posible nga mabungkag sila tungod sa paghandom sa pipila nga ilhon nga labaw kay nagka-awop ang gihugon-hugon nga sharing of power bisan wala pa gani gibutohan sa tanan.
Sa laing bahin, lahi sab ang panglantaw ni President Digong nga daw mubati siyag kaulaw kay nanganti man nga mo-resign sa pagka Pangulo kon si Pulong mahimong speaker sa Congress.
Maulaw ba siya nga Duterte nalang tanan ang naa sa gahom o may lain pa nga hinungdan nganong dili siya pabor kang Pulong?
Siya ray nasayod unsay kinauyokan sa tanan.