GIBALHOG sa mismong selda nga gi-duty-han ang babaye nga pulis human masakpan pinaagi sa kuha sa video sa cellphone dihang iyang gikuha ang P100 gikan sa pitaka sa iyang kauban nga pulis sa Women and Children Protection Desk (WCPD) sa Talomo Police Station, Martes sa gabii, Hulyo 2.
Ang suspek tawgon lang nato og patrolwoman.
Nasapon pinaagi sa kuha sa video sa cellphone nga gituyo og butang aron makita kinsay kiriwan og kamot sulod sa presinto sa pulis.
Nasayran nga ang P1,500 sa pitaka ni Pat. Girly Ann Lahay Lahay, P1,400 na lang ang nabilin human gikuhaan og P100 sa suspek subay sa kuha sa video sa cellphone.
Una niini, pipila ka oras una ang hitabo, giingong gikuha sab sa suspek ang P500 sud sa pitaka ni PSSG Lucy Guy-Ab, WCPD personnel, diin sa pag-review sa video sa cellphone, ang patrolwoman sab ang mikuha.
Tungod sa hitabo, wa magduha-duha ang Talomo Police Station sa pagpanguna ni Major Ronald Lao sa pagposas sa suspek ug gibalhog sa selda.
Ning kasamtangan gihikay na sa kapulisan sa Talomo PNP ang kasong theft nga ipasaka batok sa suspek didto sa korte.
Sa kabahin ni PRO-Davao director Marcelo Morales, dili angay nga di tagdon ang maong hitabo sanglit nagpadayon ang istriktong internal cleansing program sa kapulisan.
“I am dismayed by this incident involving another police officer into theft and victimizing fellow police officers. Nakakahiya. Malaki na nga ang sahod ay nakagagawa pa ng kawalanghiyan at sa kapwa pulis pa sa loob ng istasyon. Rest assured that she will suffer the consequences of her chosen path. She will go through what other civilian people go through when they are caught stealing,” ingon ni Morales.