GIPANGBALHIN na ang mga dagkong opisyal sa Police Regional Office (PRO)-Northern Mindanao nga maoy mangulo sa nagkadaiyang probinsya dinhi sa lalawigan.
Niadtong Hulyo 1, nipagawas og kamandoan si PRO Regional Director Rafael Santiago Jr. ngadto sa mga bag-ong posisyon sa pipila ka mga dagkong opisyal nga nangulo sa nagkadaiyang probinsya.
Si Police Colonel Rolando Destura, nga maoy provincial director sa Misamis Oriental Provincial Police Office, ang nabalhin isip chief-of-staff kon asa kini moatiman sa mga aktibidades sa Regional Director.
Hulip ni Destura mao si Police Colonel Robert Roy Bahian nga gikan nahimong Provincial Director sa probinsya sa Camiguin.
Si Police Colonel Emmanuel Hebron maoy bag-ong provincial director sa Camiguin kon hain gikan kini sa ROMOB-PRO-Northern Mindanao headquarters.
Si Police Colonel Henry Dampal maoy bag-ong hepe sa Cagayan de Oro City Police Office hulip sa mipanaw nga si Police Colonel Aganon.
Si Police Colonel Ruel Lamiing gikan sa R5 PCR maoy bag-ong provincial director sa Bukidnon Provincial Police Office.
Si Police Lieutenant Colonel Elias Hampac nga gikan nahimong hepe sa Gingoog City Police Station bag-ong head sa R5.
Hulip ni Hampac si Police Lieutenant Colonel Ariel Phillip Pontillas.
Si Police Colonel Surki Sereñas, kinsa tigpamaba sa PRO-Northern Mindanao, bag-ong hepe sa Valencia City Police Office.
Laumang aduna pay revamp ug kabalhinan sa mga sunod nga mga opisyal sa nagkadaiyang police station apan gipaabot lamang ang kamandoan sa mga bag-ong milingkod nga mga provincial director.