GI-RESPETO sa lokal nga kagamhanan sa siyudad sa Cagayan de Oro ang katungod sa mga bakwit kinsa kasamtangang nanimuyo karon sa UCCP church sa Biasong, Macasandig, siyudad sa Cagayan De Oro.
Nasayran nga hingpit na nga napapahawa ang mga bakwit kinsa anaa sulod sa kapin usa ka tuig nga nagpuyo sa Capitol Grounds nga nahimutang sa siyudad human usab nga giingong nakalapas sa building code.
Gibutyag ni Mayor Oscar Moreno nga dili kini mangabog gumikan kay dunay katungod ang matag-usa nga magbaton og pinuy-anan ug importante lang nga dili mosupak sa bala-od.
"Di man ta mangabog ang ato naa may freedom of abode, katungod kana sa tawo basta di lang pud mosupak sa balaod di lang pud mosupak sa katungod sa uban," matud ni Moreno.
Gidugang pa nga ang tanan dunay katungod ug gigarantiya kini sa atong konsitusiyon.
"Naa tay freedom of abode which is guaranteed in Constitution," dugang ni Moreno.
Nasayran usab nga ang mga bakwit gikan sa Sitio Mikamansi, Barangay Banglay, lungsod sa Lagonglong, Misamis Oriental.
Kahinumdoman nga gipangguba sa demolition team ang mga gipangtukod kaniadto sa mga bakwit nga mga balay diha sa Capitol grounds ug giguba sa maong team nga gilangkoban sa Provincial Engineering Office, Provincial Clean and Green, ug Provincial General Services Office lakip ang Provincial Risk Reduction Management Department.