GUMIKAN syete porsento nga pagsaka sa crime volume sa siyudad sa Gingoog, Misamis Oriental, ipatuman na sa kapulisan ang curfew.
Sugod niadtong Lunes sa gabii, gipatuman sa bag-ong hepe sa Gingoog City Police Station nga mao si Police Lieutenant Colonel Ariel Phillip Pontillas ang ordinansa sa siyudad nga ipatuman ang oras sa curfew.
Bout ni Pontillas nga wala nay mag-inom nga mga batan-on labina mga minor de edad pag-abot sa alas 12:00 sa kadlawon.
Usa sab kini sa kamandoan sa bag-ong administrasyon ni Gingoog City Mayor Erick Canosa nga gitahas kaniya.
Niadtong Hunyo 20, pormal nga naglingkod isip bag-ong hepe si Pontillas ug pila ka adlaw gikan niini uba-ubay na ka mga wanteed person ang ilang napasurender ug nadakpan.
"Right after sa atong pag-assume, gibalik gyod dayon nato atong strategy empowering our police personnel to do their part so with that nag respond sila ug nakakuha tag henious crime nga wanted person, rape, ug uban pa," matud niini.
Tuig 2018 nahimong hepe sa maong istasyon si Pontillas apan na relieved ug didto sa Misamis Occidental nadeistino pila ka bulan ang milabay.
Niaging tuig sa iyang pila ka bulan lamang nga paglingkod, moabot na ngadto sa 300 ka mga wanted person iyang nadakpan ug napasurender.
Ning bag-o, natandi nga misaka ang crime volume sa siyudad sa syete porsiyento kon itando sa susamang bulan sa Enero ngadto Hunyo tuig 2018.
"Paningkamotan nato nga mag-ubos ang crime volume kay sa conference nakita nato sa crime statistics nitaas gyod atong crime volume. Naay seven percent increase compare last year sa January to June 2018 compare karon same nga bulan," dugang niini.
Tipik sa mga nitaas mao kining crime against person and crime against property ug mas taas ang physical injury nga dako ug kontribusyon niini mao ang pag inom sa alas 12:00 sa kadlawon.
Sugod niadtong adlawng Lunes, Hulyo 1, dungan sa pag-assume ni Canosa isip bag-ong mayor sa Gingoog, ilang gibalik ang curfew.
Sutaon kini nila sa bulan sa Agosto kung epektibo ba kini nga lakang.
"Sabi ni mayor, i-implement strictly ang city ordinance nga curfew nga beyond 12 a.m. wala nay mag inom. Ato ning i-check sa August and let's see kung nibaba ba o effective tonight we will see kung effective among strategy," matud ni Pontillas.
Dugang niini nga ang mga madakpan sa curfew nga mga minor de edad kuhaon sa ilang mga ginikanan sa police station.