MAKILALA, North Cotabato -- Patay ang usa ka mag-uuma nga gidunggab sa iyang anak alas 5:20 sa hapon niadtong Dominggo, Hunyo 3.
Giila ang biktima nga si Socimo Eredia Susae, 58, minyo ug molupyo sa Purok Centro Barangay Malasila, Makilala.
Ang suspek nga anak giilang si Dante Susae, 29, minyo ug molupyo sab sa maong dapit.
Gibutyag ni Police Superintendent Bernard Tayong, tigpamaba sa Cotabato Police Provincial Office, nga nagkalalis ang biktima ug ang suspek atbang sa balay sa ilang silingan gumikan sa personal nga problema sa ilang pamilya nga miresulta sa pagbinayluay sa mga mahait nga pulong.
Miuli ang anak sa iyang balay ug sa pagbalik niini dunay dala na siya nga mahait nga kutsilyo.
Akto sab nga pauli na sa iyang balay ang biktima ug nagsugat sila mao nga gidunggab ang amahan.
Miikyas sab dayon ang suspek sa diha nga iyang nakit-an nga naligo na sa kaugalingong dugo ang iyang amahan.
Abtik nga nagresponde ang mga pulis nga gitawagan sa mga opisyales sa barangay nga maoy midala sa biktima sa Makilala Medical Specialist Hospital apan patay na kini dihang nahidangat sa tambalanan.
Gikanayon sa mga silingan sa biktima nga hubog ang suspek nga nasuko tungod sa bikil sa yuta nga ilang giugmad.
Sa kasamtangan, padayong gipangita sa mga awtoridad ang suspek.