GAMHANAN kaayo ang gugma. Bisan kinabuhi andam ibuhis sa tawo alang niini.
Gipamatud-an kini sa usa ka piniriso, kinsa nieskapo gikan Talisay custodial facility sa Huwebes, pasado alas 10 sa buntag, Hulyo 4, kay gimingaw sa iyang hinigugma ug pamilya.
Nahinagbo pa sa piniriso ang patrol car nga gisakyan sa bag-ong hepe sa Talisay City Police Station, Police Maj. Orlando Carag, Jr. kinsa mo-courtesy call kang Mayor Gerald Anthony “Samsam” Gullas. Maayo na lang kay nadakpan og balik si Ramises Torrejos, 33, taga Barangay Cansojong, Siyudad sa Talisay, human sa gukdanay.
Katapusan niya nga nakita ang hinigugma niadtong Hunyo 28 sa wa pa siya masikop sa buy bust operation sa Talisay Police.
Gitug-an ni Torrejos nga bisan kon napriso siya tungod sa igsuon sa iyang girlfriend, wa siyay kalagot nga gibati sa pamilya sa iyang uyab.
Si Torrejos nipasangil nga wa siyay labot kay igo ra siya nga gi-text sa igsuon sa iyang girlfriend pag-adto sa lugar diin sila nasikop sa mga poulis.
Kasong paghupot og ginadili nga drugas ang giatubang nga kaso ni Torrejos.
“Naburyong naman gud ko, Mam, kay dili daw ko maapil, akong kaso sa plea bargain (agreement). Ganahan naman gud ko kauli sa amoa. Naa koy mga priorities sa ako pamilya, ako uyab. Wala naman gud ko anang bisyuha (drugs). Naangin lang ko,” saysay ni Torrejos sa Superbalita Cebu.
Ang mga piniriso nga mopaubos sa plea bargaining agreement sa Department of Justice, mao kadtong moangkon sa kaso, diin makunhuran ang adlaw sa pagka-priso ug ang pyansa aron dali nga gawasnon.
Gihimo kini aron sa pag-decongest sa mga binilanggo diin kasagaran may kalabutan sa ilegal nga drugas ang kaso.
Ang custodial facility sa Talisay nahimutang sa ubos sa Talisay City hall. Matod ni Police Executive Master Sergeant Tim Soreño sa Talisay City Police Station nga samtang na-busy sa pagsuwat og report ang jailer nga si Patrolman Romeo Saberon, nisibat si Torrejos.
Mao nalang nabantayan sa jailer nga nidagan si Torrrejos nga hubo sa pantaas sa lawas, gikan sa prisuhan pagawas sa pultuhan sa costudial facility.
Si Soreño nga kuyog ni Carag nga pasulod na unta sa compound nakadawat sa report niapil sa paggukod. Nasikop si Torrejos, usa ka kilometro gikan sa City hall, pinaagi sa mga pulis nga naka-motorsiklo.