4 ka sindikato napiang; P1.2B shabu nasakmit

Police Regional Office-Central Visayas director Debold Sinas. (SunStar file photo)
Police Regional Office-Central Visayas director Debold Sinas. (SunStar file photo)

NAPIANG ang upat ka big time drug groups sa Central Visayas human sa subsub nga kampanya sa Police Regional Office 7 sulod sa usa ka tuig nga pamunoan ni Police Brigadier General Debold Sinas.

Nasakmit gikan sa mao nga mga sindikato ang P1.2 bilyunes nga balor sa illegal drugs.

Sobra sa katunga sa gidaghanon nasakmit gikan sa Dakbayan sa Sugbo.

Gawas sa grupo ni Franz Sabalones nga hinay-hinay na nga nawagtang, ang upat bag-ong grupo nga maoy naigo sa anti-drug campaign.

Kini naglangkob sa Ygot drug group nga gipangulohan ni Rustico Ygot; Kuratong Baleleng drug group sa siyudad sa Mandaue; Talisay drug syndicate ug sindikato sa drugas sa siyudad sa Sugbo nga gipadagan sa usa ka binilango sa Cebu City Jail.

Ang grupo sa Cebu City wa pa nganli ni Sinas.

Ang Ygot drug group gipangulohan ni Rustico Ygot, kinsa nabilanggo na sa New Bilibid Prison.

Wa na kini maka-supply sa illegal nga drugas human masikop ang iyang live in partner nga si Jocelyn Encila, kinsa nakuhaan og P190 million nga balor sa gituohang shabu.

Napatay usab sa sunod-sunod nga anti drug operations ang Kuratong Baleleng group sa siyudad sa Mandaue nga gikan sa Ozamiz City.

Nangasikop ug nangamatay usab ang mga dagkong drug personality sa Siyudad sa Talisay.

“As per records namo, we’re so happy to announce, for a year, we have neutralized four drug syndicates diri sa atoa. These are new groups and one of them is Ygot syndicate. We have also one in Mandaue which belongs to the Kuratong Baleleng remnants,” matod ni Sinas.

Sulod lang sa usa ka tuig nga kampanya sa kapulisan sa Central Visayas sugod Hulyo 1, 2018 hangtod Hulyo 1, 2019, mokabat na ngadto sa P1.2 billion nga balor sa illegal nga drugas ang ilang nasakmit.

Kini na ang labing dako nga balor sa illegal nga drugas nga naimbargo sa kapulisan sa kasaysayan sa Police Regional Office 7 sukad gideklara sa gobyerno ni Presidente Rodrigo Duterte ang gubat batok sa illegal nga drugas.

Sa datos nga gihatag ni Sinas, kapin sa 130 ka kilo sa shabu ang ilang nasakmit, 392 kilos sa marijuana ug 431 ka buok tabletas sa ecstacy.

Sa pito ka police offices sa tibuok rehiyon 7, ang Siyudad sa Sugbo ang nag una, diin nasakmit ang 89.916 kilo nga shabu nga balor og P691,479,930.

Gisundan kini sa Probinsya sa Sugbo nga adunay P185.4 million; Negros Orienal nga adunay P32.2 million.

Nasakmit usab sa kapulisan sa Bohol ang shabu nga balor og P28.8 million ug ang Mandaue nga adunay P11.3 Million.

Wa pa matala sa listahan sa PRO 7 ang mga bag-ong dakop sa Siyudad ug Probinsya sa Sugbo nga adunay kapin na sa duha ka kilo sa gituohang shabu ang nasakmit.

Moabot og 9,609 ka mga drug personalities ang nangadakpan sa 7,152 ka anti drug operations, diin 4,354 niini mga drug users samtang 5,255 ang pushers.

Nabantayan ni Sinas nga sa 9,609 ka mga drug personalities nga nangadakpan, 9,226 niini wa malakip sa ilang target list.

Moabot usab sa 109 ang napatay sa anti drug operation ug upat ka mga pulis nasamdan.

Tungod sa kalampusan sa kapulisan sa Central Visayas, nabutang sa number 1 ang PRO 7 sa tanang police regional offices lukop nasud.

Dugang sa heneral nga sa kadaghan sa illegal nga drugas nga nasakmit, nagpasabot kini nga ang Sugbo maoy usa sa mga dapit nga dunay labing daghang mamalitay.

“It means na Central Visayas, Cebu island itself, is really the next very big market for shabu and marijuana. Bisan daghan mi nadakpan, daghan gihapon manulod., dugang ni Sinas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph