USA ka waste recycling corporation nga nagbase sa Barangay Tayud, lungsod sa Consolacion ang gibisita ni Mayor Jonas Cortes para susihon ang residual waste o basura nga di malata nga ilang nakolekta gikan sa dakbayan sa Mandaue.
Nibisita si Cortes sa planta sa Guun Corp. Limited sa Sitio Sun-ok, Barangay Tayud ganihang buntag, Hulyo 4, para mosusi sa kasabutan tali sa maong kompanya ug sa lokal nga kagamhanan sa Mandaue nga nangolekta sa basura sa dakbayan sa presyong P700 ang kada tonelada.
Ang maong mga basura nga nakolekta sa maong kompanya paliton ug gamiton usab sa Apo Cement Corporation ubos sa kantidad nga P1,800 ang matag tonelada.
Usa kini sa gitan-aw karon ni Cortes tungod kay gilaraw niini nga usbon na unya niya ang skedyul sa paghakot sa mga basura sa dakbayan, tungod kay nagtuo siya nga usa kini sa mga hinungdan sa paghuot sa traffic sa kadalanan.
Ang Mandaue dunay lima ka mga compact nga truck sa basura, apan matud sa Mandaue City Environment and Natural Resources Office, nga dunay pipila sa kinatibuk-an nga 27 ka mga barangay ang nag doble ug truck sa basura.
Matod ni Cortes nga kon libkason na unya ang truck ban sa dakbayan, mamahimo na unya nga makahakot ang ang mga truck sa basura matag alas otso sa gabii.
Matod ni Reylann Rombla, tigdumala sa proseso sa waste recycling sa Guun, nga dunay muabot sa 10 ka tonelada sa basura ang ilang madawat gikan sa dakbayan sa Mandaue matag adlawng Martes ug Huwebes.
Duna kini mga ekipo gikan sa nasud sa Japan nga maoy mudugmok ug muputos sa mga basura nga andamon na usab aron i-deliver sa mga kompanya sa semento.
Bisan sa maong paagi giklaro ni Cortes nga dili kini buot pasabot nga wala na’y basura nga ilabay sa Binaliw Landfill tungod kay mao kini ang labayanan sa mga basura nga malata.
Giingong “eco-friendly” ang pag gamit sa mga basura isip sugnod sa paghimo ug semento kon itandi sa pag gamit ug coal nga gikuha gyud gikan sa natural resources.
Giklaro hinuon ni Vince Uy, ang sales and marketing manager sa maong kompanya, nga wala’y angay kabalak-an ang mga tao tungod kay mas ubos ug 17 porsyento sa carbon dioxide emission ang dinugmok nga plastic kon itandi sa uling. Susama sab kini ug heating value sa uling hinungdan nga dili kini mubuga ug grabe nga aso.