PLANONG buhion sa lokal na kagamhanan sa dakbayan sa Talisay ang nabantog nga "Lechon Festival." Lakip na niini ang uban pa nga mga kalihukan sa natad sa turismo nga buot mapalambo ni Talisay City Mayor Gerald Anthony "Samsam" Gullas Jr.
Ang turismo, uban sa edukasyon, ug dinaliang aksyon sa mga suliran sa dakbayan,ang tulo sa major nga programa nga buot ipatuman ni Gullas sud sa iyang termino isip mayor.
Gihimo ang una nga Ad hoc committee meeting pag Huwebes sa buntag, Hulyo 4, alang sa gitinguha nila nga buhaton alang na sa pagsalmot sa Pasigarbo sa Sugbo, diin ang lamian nag lechon sa Talisay ang ilang ibida.
Gawas sa lechon, gitun-an na usab karon ang pagpalambo sa tourist destination diha sa Barangay Poblacion.
Sa pagpakigtagbo sa batan-ong mayor kang Cebu Gov. Gwendolyn Garcia niadtong Miyerkules sa hapon, Hulyo 3, usa ang Talisay sa nipadayag sa iyang kaikag nga mosalmot sa "Pasigarbo sa Sugbo" alang karong Agusto atol sa Founding Anniversary sa Probinsya sa Sugbo.
“That we will support her tourism thrust sa province. Ang City of Talisay, can use it also nga madungog pag-ayo ug maila pagbalik ang atoang lami nga lechon sa Talisay,” asoy ni Gullas.
Atol unya sa Pasigarbo ning tuiga, opisyal sad nilang ibalik ang Lechon o Inasal Festival sa Talisay.
Sulod na sa unom ka tuig nga wala gisaulog sa dakbayan sa Talisay ang Lechon Festival human kini gipaundang ni kanhi mayor Johnny De los Reyes niadtong 2013.
Ang maong festival gipasiugdan niadtong tuig 2005, isip highlight sa kapistahan ni Sta. Teresa de Avila matag bulan sa Oktubre.
Lakip na sa ilang gituki ang pagpalambo usab sa turismo sa Barangay Poblacion diin adunay gitahasan kalabot sa pagsusi sa luna, kon asay gipanag-iya sa gobyerno, kon adunay mga inprastraktura nga naggamit niini ug unsay angay nga buhaton.
Kini alang na usab sa himuon nga disensyo sa pagpalapad sa turismo ilabi na duol sa Liberation Park sa Barangay Poblacion.
Usa ka priority sa maong programa mao ang pagpahimutang og "food court" diha sa Barangay Poblacion aron maoy direktang tuyuon sa turista ug anaa na dinha ang tanang namaligya og lechon.
“We will make sure that it will be improved because he (Gullas) has lots of plans to improvise the entire area gyud. Ang mga turista before going to the south, will make sure tourist to come to Talisay, because we make our place another destination for ‘kaon’ because as we all know Talisay has celebrated for the lamiang lechon in Cebu,and we will make sure that we are still the best,” pagpasabot ni Mikki Aznar, community affairs officer sa City Tourism Office. (FMD)