PAGBATOK sa dengue ug dili lang ang pagpahinundum sa publiko kalabot sa ilang kaluwasan gikan sa bisan unsa nga kalamidad ug ang kalikayan ang sunog ang prayoridad sa kabomberuhan sa dakbayan sa Talisay.
Ning pag-obserbar sa National Disaster Resilience Month, mas subsob ang gihimo nga pagpangduaw sa mga bombero sa Talisay sa kabarangayan ug sa mga tunghaan.
Matud ni Fire Chief Inspector Arra Alpajaro, Talisay City Fire Marshal, kini may labot na sa mga angay buhaton isip safety tips kon adunay linog, pagbaha, sunog ug uban pa.
Gitudluan usab ang mga tinun-an sa mga basic nga buhaton alang na sa first aid ug pag-rescue.
Ug diha sa ilang paghatag og seminar, ilang giawhag ang mga kabarangayan ug mga tunghaan nga kinahanglan adunay drum o sudlanan sa tubig nga gilain gyud aron maoy daling magamit kon ugaling adunay moulbo nga ka'yo, ilabi nga sagad halos tanan dili pa maka-afford og fire extinguisher.
Gitug-an ni Alpajaro nga kanunay nila nga pasidaan nga takluban gyud ang mga drum o bisan unsa nga container aron dili kini mahimo nga itlugan sa mga lamok.
Ug nipahimangno usab sila nga ipangyabo gyud ang mga adunay mapundo nga tubig diha sa mga dahon o sa bisan asa nga lugar.
Kini aron kalikayan nga modaghan ang lamok, ilabi na nga anaa diha ang mga tinun-an ug mga magtutudlo.
“We are not just reminding the students and teachers, about the safety tips, with regards to sunog, we do the earthquake drill and others, but also we see to it na ma-remind sila na hind imaging source sa pagdami ng lamok, especially sa panahon ngayon na umuulan, dumadami ang lamok, and yung mga bata and teachers, ang posible mabiktima ng dengue, pagnagpabaya,” pasabot ni Alpajaro.
Nakig-alayon na usab ang BFP Talisay ngadto sa City Disaster Risk Reduction and Management Office alang na sa himuon pa nga mga kalihukan ning National Disaster Resilience Month, sa bulan sa Hulyo. (FMD)