SUPERBALITA CEBU

Super Suroy: Naglumbay nga Mystical Hills sa Hinakpan

SA MATAG lugar adunay suroyanan nga makadani sa mga turista ug seguradong balikbalikan gumikan sa katahom niini.

Sa Central Visayas, kon may Kandungaw ug Osmeña Peaks sa Sugbo, Chocolate Hills sa Bohol, nindot nga sunset ug beaches sa Siquijor, ang Negros Oriental may pambato sab, usa niini ang Hinakpan Mystical Hills sa siyudad sa Guihulngan.

Dihang nasuroy ang among grupo sa dapit niadtong Mayo 24, swerte mi kay kami ra ang mga bisita niadtong higayona.

Hilom sa dapit ug siguradong kalinaw ang imong masinati.

Gibanabana nga 30 minutos ngadto sa 45 minutos ang biyahe gikan sa sentro sa Guihulngan, maabot nimo ang Hinakpan Hills sa Barangay Hinakpan.

Diin gikan ang pulong nga Hinakpan?

Sigon sa mga estorya sa katigulangan, ang pangan nga Hinakpan kay gikan sa pulong nga “takpan” nga klase sa gahi nga kahoy nga abunda sa dapit.

Giingong moabot sa kapin 230 ka mga bungtod nga may lainlaing gidak-on ug porma ang nagkatag sa lugar. May gagmay ug dagko nga mga bungtod, adunay lingin ang mga tumoy samtang aduna say perfect cone ug may tower-shaped.

Sa pagpadung pa lang sa Hinakpan Mystical Hills, struggle na ang biyahe kay adunay bahin sa karsada nga batuon ug dili sementado.

Delikado mobiyahe kon dili ka suhito sa terrain kay kuyaw og mahaybol imong sakyanan o motorsiklo sa bung-aw kay may bahin nga tungason padung sa mga bungtod nga bakiliron ug way ali nga barrier sa isig ka kilid.

Hinuon, may bahin nga sementado ang karsada.

Challenging man ang pipila ka karsada padung sa Hinakpan Hills, apan sulit inig abot na nimo sa lugar.

Monte Calvario

Pag-abot namo sa dapit, makita nga nagpabilin pa ang natural nga kaanindot sa mga bungtod.

Adunay bahin nga na-developed na ug gihimo nga pilgrimage site nga gitawag karon og Monte Calvario. Ang Monte Calvario adunay Stations of the Cross nga may 200 kapin ka sementado nga hagdanan paingon sa dako nga krus nga puti nga nahimutang sa kinatumyan sa bungtod.

Mga 10 minutos ngadto sa 15 minutos ang pagtungas agi sa mga hagdanan.

Inig abot sa kina-ibabwan, matagamtaman nimo ang presko ug bugnaw nga hangin sa ibabaw sa bungtod samtang naglantaw ka sa nindot nga talan-awon sa palibot.

May viewing deck diin makita ang 360 degrees nga talan-awon sa palibot ug makita ang rice terraces, mga tanaman sa mga utanon sa mga molupyo ug ang kasikbit nga mga bungtod.

Sa dili pa ka makasaka sa Monte Calvario, kinahanglan nga magpa-register ka daan sa tigbantay, paagi kini aron masubay kon pila ka mga bisita ang niduaw sa lugar.

Way entrance fee sa Monte Calvario apan may donation box nga nakabutang, mag-agad kon pila ang imong ihatag.

Maka-ingon ka nga bulahan ang Guihulngan sa mga nindot nga talan-awon niini nga hinimo sa Ginuo. /


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph