STARRING sa mga balita ang mga opisina sa mayor sa syudad sa Sugbo ug sa Lapu-Lapu. Apan unsay nakalahi sa duha? Ang opisina sa mayor sa ika-walong andana sa annex building sa Cebu City Hall morag gi-demolish. Intact pa ang opisina sa mayor sa ikaduhang andana sa Lapu-Lapu City Hall.
Sa Cebu City Hall, gipanglangkat sa mga sinugo ni kanhi mayor Tomas Osmeña ang kisame, giukal ang mga tiles, gitangtang ang inuduro ug lababo, giputol ang mga koneksyon sa tubig ug kuryente. Di na mailhang opisina sa mayor. Nawagtang pa ang official seal sa syudad.
Sa Lapu-Lapu City Hall, way kausaban sa opisina ni kanhi mayor Paz Radaza nga napiling kongresista sa miaging eleksyon. Gani, sumala sa inventory sa General Services Office (GSO) nagsagol pa ang mga personal ug kabtangan sa gobyerno sa maong opisina.
•••
Sa nahitabo sa opisina sa mayor sa syudad sa Sugbo, si kanhi mayor Osmena morag hingpit nang mitalikod sa City Hall. Daw panamilit nga wa nay pagbalik, wa nay paglingi pa sa gigikanan. Sa Iningles pa, “burning the bridges,” aron magkalisud-lisod ang magsunod.
Apan si Congresswoman Radaza ingon sa dunay gikawilihan sa iyang opisina sa Lapu-Lapu City Hall. Di siya gustong mobiya niini. Ug ang maong kawili gihanigan niyag usa ka ordinansa nga gipasar sa konseho sa syudad kaniadtong Hunyo 18, 2019, 12 ka adlaw sa wa pa matapos ang iyang termino.
Ingon pas taga Cabadiangan, “Klariks kaayo ni bay.” Bitaw, ang usa ka kongresista adunay budget alang sa iyang opisina ug mga staff. Mahimo siyang mokuha og mas luho pa nga opisina kay sa City Hall. Gawas lang kon duna siyay gikawilihan.
•••
Ang mga abogado ni Cebu City Mayor Edgardo Labella nag-andam na sa tukmang mga kaso nga ipasaka batok ni kanhi mayor Osmeña ug sa iyang mga sinugo sa paggusbat sa opisina sa mayor.
Si Lapu-Lapu City Mayor Junard “Ahong” Chan mikuwestyon sa ordinansa nga gisandigan ni Kongresista Radaza sa iyang padayong pag-ukopar sa iyang buhatan. Kay matod pa ni Chan, depektuso ang maong ordinansa ug wa pa kini mapublikar.
Natapos na ang termino ni Osmena ug Radaza sa pagkamayor. Si Osmena morag nanamilit nga dala ang kapungot. Si Radaza di gustong mobiya. Pero makabalik ra gihapon siya kon modaog siyag balik pagkamayor.