MGA duwa karon:
4:30 pm. - Blackwater vs. Magnolia
7:00 pm. - NLEX vs. San Miguel
Sa tinguha nga mahaw-as gikan sa delikadong sitwasyon nga ilang giatubang karon, ang powerhouse San Miguel Beer moparada og bag-ong import sugod karon gabii sa dihang ilang ikasangka ang naghingutas usab nga Nlex Road Warriors sa nagpadayon nga PBA Commissioner’s Cup sa Mall of Asia Arena didto sa Kaulohan.
Kini human nga ang Beermen nasugamak ug duha ka sunodsunod nga makauuwaw nga kapildihan bisan pa man sa presensiya ni Charles Rhodes, ang import nga nakatabang og dako sa ilang pagsakmit sa 2017 Commissioner’s Cup title ug mao usab ang milabni sa Best Import award.
Mohulip ni Rhodes ang kanhi NBA player nga si Chris McCullough, 24 anyos, kinsa nakaduwa sa Brooklyn Nets ug sa Washington Warriors sulod sa tulo ka seasons niadtong 2015-2018.
Ang manager sa SMB nga si Gee Abanilla mipasabot nga iyang gidayeg ang gipakitang katakos ni Rhodes apan tungod sa ilang sitwasyon 2-5 nga baraha kinahanglan mopatuman sila og kausaban sa team.
Ang Beermen napildi sa Magnolia ug Columbia sa uwahi nilang duwa ug nahagsa sa ikanapulo nga dapit nga naghulga sa posibling pagkataktak og sayo sa elimination round.
Gawas sa Nlex, makigsangka pa usab sila sa Rain or Shine (3-5) ug Meralco (3-6).
Hinuon ang Nlex, sa 2-7 nga baraha nawad-an na sa paglaom nga makasulod sa sunod round.
Sa preliminary game, sikit nga kombati ang gipaabot nga masaksihan sa panagtakos sa nagkainit nga Magnolia Hotshots ug Blackwater Elite.
Samtang ang Hotshots kampante kaayo sa ilang import nga si James Farr, ang Blackwater nga maayong nakasugod sa ilang kampanya, 5-1, ubos sa ilang import nga si Alex Stepheson, moparada usab og bag-ong import nga si Staphon Blair.
Ang 26-anyos nga Blair kinsa miabot niadtong Sabado, nakaduwa og upat ka season sa University of Central Florida sa US NCAA sa wa pa kini makadduwa sa professional league sa Belgium, Slovenia ug Portugal.
Ang Blackwater, sa kasamtangan naghupot og 5-3 nga baraha samtang 5-2 ang sa Hotshots. (JBM)