MAKIGTAGBO si Mandaue City Mayor Jonas Cortes sa kadagkuan sa Big Hotel aron hapsayon ang issue sa pagpasira niini ubos sa miaging administrasyon.
Nipasalig si Cortes nga himuong “business friendly” ang Dakbayan sa iyang paglingkod.
Matod ni Cortes nga kini usa lang usab sa mga angay tukion alang sa kalamboan sa Siyudad.
“Ang Dakbayan sa Mandaue under sa atong administration, kani akong ipasalig sa business community nga ato gyung ibalik ang Mandaue pagka business friendly city. We are open and willing to sit down with kuan (Big Hotel) kay para naka-above board man sad to,” matod ni Cortes.
Matod niya nga wa hinuoy angay sabutan tungod kay alang niya balido ang maong kontrata.
“Ang amo lang hapsayon ni namo with Big Hotel. Wa may problema kay ang kontrata above board man usab. So, there’s no problem. There’s nothing to negotiate no kay para nako ang karong kontrata balido man gyud to. But again, we would talk to the management para ma straighten, ma iron out ang tanan,” pasabot ni Cortes.
Tulo ka mga establisemento ang gipasirad-an sa Kagamhanan sa Dakbayan tungod kay way business permit.
Gilangkoban kini sa Big Hotel, Big Hotel Suites ug Linear Coffee Shop sa Mantawi Drive, Brgy. Tipolo, Dakbayan sa Mandaue.
Ang kompaniya nga maoy orihinal nga nag-abang sa Siyudad, nipaabang niini sa laing kompaniya nga way pagtugot sa Konseho sa Siyudad.
Hinungdan nga niadtong Pebrero 27, unang gipasirad-an o gipataptan og closure order sa Mandaue City Legal Office ang Linear coffee shop nga anaa sa kilid sa entrance sa Big Hotel.
Gisunod usab niini ang Big Hotel Suites ug Big Hotel.
Apan niadtong Marso, nipadala sila og hangyo sa kanhi administrasyon nga hatagan sila ug 90 ka adlaw sa pag secure sa mga dokumento.
Sa pagsusi sa Superbalita Cebu gahapon sa hapon, padayong nag-operate ang hotel.