LIMA ka buwan sa di pa ang Pasko, adunay maayong balita alang sa mga barangay worker sa lalawigan sa Sugbo.
Si Gobernador Gwen Garcia nikompirmar nga karong Disyembre matagamtaman sa mga trabahante sa kabarangayan sa lalawigan sama sa barangay health workers, barangay animal health aides, barangay nutrition scholars ug tanods ang usbaw sa ilang incentives gikan sa Cebu Provincial Government.
Agi og pagtuman sa iyang saad atol sa kampanya, gikan sa P2,400 nga nadawat sa mga BHW, Baha, ug BNS sa miaging unom ka tuig ubos sa administrasyon ni kanhi gobernador ug karon Bise Gobernador Hilario Davide III, paumentohan ni Garcia ngadto sa P4,000 ang ilang insentibo.
Samtang ipadoble niya sa P3,000 ang insentibo sa mga tanod, gikan sa P1,500.
Matod niya, ang P2,400 ug P1,500 mao pa ang kantidad nga nadawat sa mga barangay worker pagbiya niya pagka gobernador unom ka tuig na ang nakalabay.
Ubos sa iyang administrasyon, unang nakadawat og insentibo ang mga trabahante sa kabarangayan. “Unya ako nang ihatag apil sa akong saad, December, aron duna silay magamit mamasko,” dugang ni Garcia dihang nahinabi sa mga tigbalita niadtong Huwebes, Hulyo 4.
Ang umento sa incentives sa mga barangay worker isud niya og apil sa supplemental budget nga iyang ihangyo sa Provincial Board nga ipasar. (SCG)