NAHIMONG lakang sa Police Station (PS) 9 sa Macasandig nga magpahigayon og breast milk letting activity human nga nag-viral sa social media ang storya ni Police Corporal Llena Sol Josefa Mainar Jovita nga gipatik niining mantalaan sa SunStar Superbalita Cagayan de Oro.
Kini kalabot sa sekretong pagdonar ni Mainar sa iyang breast milk sa usa ka bata nga nagsakit diha sa Maria Reyna Hospital niaging tuig.
Gibutyag ni Jovita sa SunStar Superbalita nga sukad nga nag-trending ang iyang storya, daghan sa mga inahan ang gasige og tawag sa ilang buhatan ug gahangyo og gatas kaniya.
“Dili lang nako ma-accomodate tanan kay ako raman isa ug naa sab akong anak nga gasuso sa akoa,” matud niini.
Gumikan sab sa iyang nahimo, nakadawat og good deeds award gikan sa Police Regional Office 10 si Mainar.
Tungod niini, ilang nahuna-hunaan sa istasyon sa pagpangulo pa niadto ni Police Major Mantala, kanhi hepe sa PS9, naghagit ug nangusog nga maglusad og breast milk letting activity.
Sa sinugdan, namalit sila og gamit alang niadtong walk in nanay nga magdonar sa ilang gatas kay anaa nay refrigerator sulod sa buhatan, adunay storage alang sa gatas, pump ug uban gamit nga karon anaa sa PS9 ug gisigurong limpyo ang gatas ug na screen kini gikan sa mga health center.
Matud ni Mainar nga dinhi ilang giplano ang breast milk letting activity ug napili ang Barangay Nazareth gumikan adunay grupo sa mga wonder nanay sa maong barangay nga bout sab makatabang sa mga bata nga nagkinahanglan niini.
Niadtong adlaw’ng Miyerkules, Hulyo 3, unang higayon nga gilusad ang breast milk letting activity kon diin nagmalampuson kini.
Gitambongan sa ubay-ubay ka mga nanay nga adunay gasa ug abunda sa gatas.
Tanang gatas nga nalikom pagadalhon sa City Hospital sa Jr Borja sa pagpangulo sa pediatrician nga si Dr. Arveen Laurito niingon nga dako iyang kalipay nga gihimo kini sa mga nanay sa Nazareth tungod kay sama sa dugo gikinahanglan gihapon sa mga bata ang gatas aron maghatag kusog kanila.
“Ang gatas sa nanay grabe ka nutritious ug makahatag og kusog sa atong infants. We discouraged formula ug kung pwede walay beberon kay ang gatas sa mama naa diha ang nutrisyon,” butyag niini.
Dugang ni Dr. Laurito nga kini nga mga gatas nga nalikom ibutang sa ilang storage room ug ihatag niadtong mga bag-ong natawo sulod sa balay tambalanan.
“Ihatag nato ni didto sa mga bata nga ang mga mama like naay bag-o lang nga incidente nakabsan intawon sa kinabuhi so kadto nga bata nagkinanglan gyod og gatas, naa pod mga mama nga dili pa magawasan og gatas kay naay gihambin nga sakit so mao kini sila ang mahatagan nato ani nga gatas,” matud ni Laurito.
Laumang sunod sunod pa nga breast milk letting ang ipahigayon sa PS9 Macasandig sa ilang area.