MOABOT ngadto sa 275 ka mga nanag-iya og armas ang wala nag-renew ug naghupot og expired nga armas sa dakbayan sa Gingoog, Misamis Oriental.
Kini ang gibutyag ni Police Lieutenant Colonel Ariel Phillip Pontillas kinsa hepe sa Gingoog City Police Station.
Gibutyag niini nga adlaw’ng Miyerkules, Hulyo 3, magsugod na sila sa paglusad og oplan katok kon diin pagatuktokton ang mga tag-iya niining mga wala ma renew nga armas nga nagdumili sa pagrenew niini.
“Atong ilusad ang oplan katok sa mga unlicensed firearms holder nga nagdumili sa pagrenew sa ilang armas,” matud ni Pontillas.
Laraw ni Pontillas nga mas mapahapsay ug malinawon ang siyudad taliwala paman dili gyod kini kaayo problema.
Ang pagtaas sa kriminalidad sa 7 porsiyento rason sab nganong ilang gitakdang ibahin o i-cluster ang mga barangay.
Dugang niini nga sa usa ka police moabot sa 2,500 ka tao ug ang siyudad aduna lamang 65 ka mga police personnel. Dili kini igo hinungdan laraw nilang magpasar og resolution paghangyo nga madugangan ang siyudad.
Gikinahanglan nga i-cluster gumikan kay sa kalayo sa barangay usahay malangan gyod ang pagresponde.
Mando sa bag-ong mayor nga kinahanglan 1 ngadto 3 minutos lamang ang responding time kon adunay mga insidente ug mahimo lamang kini kon i cluster ang matag barangay ug didto ibutang ang mga polis aron mas paspas nga makaresponde. Ang Gingoog adunay moabot 79 ka mga barangay.
“Ang proposal sa among mayor nga i-cluster ang barangay gikan San Luis ug Lunao usa ka police patrol den Anakan paingon sa Talisay usa ka police patrol aron dili gyod malangan sa pagresponde,” matud niini.