SUBAY sa selebrasyon sa Kadayawan Festival sa Davao City karong Agosto, hinay-hinay na sab nga gisugdan ang nagkadaiyang aktibidades kabahin sa kalihukan.
Usa na dinhi ang Habi Kadayawan, Fashion Accessories Design Competition.
Sa guidelines nga gipaguwa sa Davao City Tourism, ang kompetisyon bukas sa 18 anyos pataas, nga dunay interes ug abilidad sa pagmugna sa mga world class nga fashion accessories ug luxe wear apparel nga inspired sa abunda ug halapad nga kultura sa Davao nga gilangkuban sa 11 ka tribu.
Bukas ang kompetisyon sa mga naggikan sa Zamboanga Peninsula, Northern Mindanao, Davao Region, Socsksargen, Caraga Region ug Autonomous Region in Muslim Mindanao (Armm).
Ang fashion accessories may tulo ka kategoriya, kini ang professional, student ug hobbyist o artisan.
Dugang pa may tulo ka grand prize winners nga modala og tag P100,000 matag usa ug Manila fame exposure, samtang laing 12 ang honorable mention nga modawat og tag P5,000 matag usa.
Sa Formal Luxe Apparel Category, may usa ka grand prize winner nga modawat og P150,000 ug uban pang insentibo.
Ang first runner up makadawat og P75,000, samtang P50,000 ang second runner up ug pito ka honorable mention nga may tag P5,000 matag usa.
Ang kompetisyon magrepresenta sa Fashion Accesories ug Appratel sa 11 ka tribu sa dakbayan nga gilangkuban sa Matigsalug, Ata Manobo, Obo-Manobo, Jangan-Clata, Bagobo-Tagabawa, Maguindanao, Maranao, Tausug, Sama, Iranun, ug Kalagan.