Pilgrimage visit ni Sto. Niño gikahinaman

DIGOS CITY -- Naghinam-hinam na ang mga deboto ni Senior Sto. Niño de Cebu nga mahikap ang balaang imahe nga mohimo og tulo ka adlaw nga pilgrimage visit sa pipila ka mga simbahan sa Davao Region sugod Huwebes, Hulyo 4.

Huwebes sa buntag, nahidangat ang balaang imahe sa batang Hesus sa Davao International Airport diin gisugat sa mga organizers.

Subay sa gihan-ay nga schedule sa pilgrimage, unang dalhon ang imahe sa San Pedro Cathedral sa Dakbayan sa Davao diin himuon ang arrival mass ug sundan sa benerasyon ug nobena.

Mismong si Reverend Father Pacifico Nohara Jr., OSA (Order of St. Augustine), kinsa mao ang prior rector sa Basilica Minore del Santo Niño de Cebu, mao ang nangulo sa arrival mass sulod sa San Pedro Cathedral.

Banda alas 2 sa hapon nahidangat sa St. Joseph the Worker Parish sa lungsod sa Sta. Cruz, Davao del Sur ug alas 3 sa hapon, gipahigayon ang Santos nga Misa ug usa ka oras nga benerasyon alang sa imahe.

Di sab matukib ang gibating kalipay sa deboto nga si Lola Remegios Bueno, kinsa usa mga deboto sa Balaang Santo.

“Wa ko kasabot sa akong gibati nga nahikapan gyud nako ang milagrusong Santo Niño,” niya pa kinsa midason nga moadto gyud siya sa Sugbo matag bulan sa Enero alang sa pagsaulog sa kapistahan niini.

Gitataw sab niini nga maglisud sila sa pagduol sa imahe didto sa balay niini tungod sa bagang duot sa katawhan nga naningkamot makaduol sa imahe.

Pagka-alas 6 sa gabii, gidala sab kini sa Mary Mediatrix Cathedral diin gihalaran og Santos nga Misa ug gisundan sa benerasyon.

Biyernes, Hulyo 5, himuon ang farewell mass sa nahisgutang simbahan sanglit alas 7 sa buntag mogikan sab ang batang Hesus padung sa Sto. Rosario Parish Church sa lungsod sa Malita, Davao Occidental.

Banda alas 10 sa buntag himuon ang arrival mass sa maong simbahan ug banda alas 3 sa hapon dunay Santos nga Misa sud sa Malita gymnasium alang sa mga kawani ug opisyal sa probinsiya ug sunod-sunod nga misa na ang ipahigayon human ibalik kini sa parokya sa lungsod banda alas 6 sa gabii ug benerasyon hangtud alas 12 sa gabii.

Sabado, Hulyo 6, himuon ang midnight mass alas 12 sa tungang gabii.

Laing misa ang ipahigayon sa samang simbahan banda alas 3 sa sayong kabuntagon ug sundan sa grand procession kuyog ang imahe sa Our Lady of Fatima.

Banda alas 6 sa buntag ipahigayon ang farewell mass aron dalhon kini sa San Isidro Labrador Parish sa Dakbayan sa Digos diin ipahigayon ang arrival mass alas 10 sa buntag.

Ipahigayon sab ang benerasyon hangtud alas 2 sa hapon una kini mobalik og biyahe padung sa Dakbayan sa Davao.

Sa alas 3 sa hapon dalhon sab ang Santo Nino ngadto sa Holy Spirit Perpetual Adoration Convent (Pink Sisters), alas 4 sa hapon, ipahigayon ang reception sud sa Regional Major Seminary of Mindanao (Remase) ug ang benerasyon.

Banda alas 5 sa hapon, ipahigayon ang “votive mass” alang sa Santo Niño, ug sundan sa usa ka Sinulog, benerasyon ug vigil sa imahe.

Alas 5 sa sayong kabuntagon sa Dominggo, Hulyo 7, himuon ang farewell mass ug banda alas 7 sa buntag dalhon na kini sa Davao International Airport alang sa pagbiyahe pagbalik sa dakbayan sa Sugbo.