MALANGAN og pipila ka mga adlaw ang paghiabot ni naturalized player Andray Blatche sa nasod alang sa iyang partisipasyon sa training sa Gilas Pilipinas nga hugot na’ng nangandam alang sa FIBA Basketball World Cup nga ipahigayon sugod karong Agusto 31 sa China.
Sa orihinal nga eskedyul, nakatakda untang moabot si Blatche sa nasod karong Hulyo 8 apan gumikan kay kinahanglan pa kining motambong og husay sa korte sa Amerika alang sa kustodiya sa iyang anak hinungdan nga nauswag ang paghiabot niini.
Gibanabanang makaabot si Blatche karong Hulyo 12 o 13.
“There’s going to be a slight delay,” matod ni national Guiao sa interbyu sa www.spin.ph. “Meron siyang court hearing sa custody case ng anak niya. Aattendan niya muna yun bago siya makalipad dito.”
Karong Hulyo 8 nakatakdang ibutyag ni Guiao ang iyang pinal nga 13-man lineup. (ESL)