DAGHANG nangahulog lusok sa luha
Tungod lamang sa usa ka dula,
Dulang may tanghaga uga kahinam
Gugma ang nailhan sa tanan.
Duha ka linalang magtabi
Maghisgot sa kinabuhi.
Pulong nga lisod masabtan
Masinati lang sa atong dughan.
Usahay sila magsampitay
Sa tam-is mga pulong magbayluay.
Ilang mga kiliran magkadikit,
Mga uhaw nga ngabil magpilit.
Duha ka tawhanong binuhat
Sa lawas maghikapay, maghapuhap.
Hangtod sa ilang pagbati sila gianod
Gibayaw ibabaw sa panganod.