NAA ra sa upat ka vaults ang tanang drugas nga nasakmit sa kapulisan sa Central Visayas.
Ang drugas nga balor og P1.2 bilyunes gisulod sa upat ka managlahing mga vault nga gipapalit ni Police Regional Office (PRO) 7 Director Police Brig. General Sinas.
Ang drugas naa sa Philippine National Police (PNP) Crime Laboratory gipamutang.
Ang drugas nasakmit sukad nagsugod sa pagpangatungdanan ni Sinas.
Matod ni Sinas nga luwas ang drugas, diin di kini mahilabtan ni bisan kinsa nga personnel sa Crime Lab.
Sukwahi kini sa mga pagduda sa publiko nga ipangbalik ra usab sa karsada kun recycled ang nakuha nga binultong shabu.
Sa dihang gipangutana ang heneral kon mahimo ba kini nga makita sa mga sakop sa media, siya nibalibad.
Iyang gipasabot nga di kini mahimo sanglit ma technical sila sa korte
Di pa usab kini mahimong sunugon sama sa gihimo sa Philippine Drug Enforcement Agency (PDEA) sa kaulohan nga mobalor og P6 bilyones.
Gipasabot ni Sinas nga ang tanang anti drug operation adunay tawo nga nangadakpan ug gipasakaan og kaso sa korte.
Ang makamando nga sunugon ang mga nakuhang drugas mao ra ang korte.
Sa pagkakaron, di pa kini mahimo tungod kay nagpadayon pa ang husay sa kaso.
Mipuli
Bag-ong hepe sa Talisay City Police station Police Major Orlando Carag Jr. pormal nang nilingkod sa katungdanan.
Si Carag nisaad nga iyang ibalik ang maayong imahe sa Siyudad sa Talisay nga nagusbat tungod sa problema sa illegal nga drugas.
Si Carag, sa wa pa gidestino sa Siyudad sa Talisay, maoy aide de camp ni Sinas.
Sa iyang pagdawat sa katungdanan, iyang gisaad nga puhagon ang problema sa illegal nga drugas sa dakbayan.
Matod niya nga di kini niya makab-ot kon way panaghiusa tanang sektor sa dakbayan.
“Let us remove the stigma of being tagged as shabu city capital of the Philippines. We will bring back the old glory of this beloved city. In so doing, I will expect every citizen of Talisay City, particularly the barangay officials, to be watchful of our constituents in our area of responsibility,” matod ni Carag.
Samtang gipasalig sa mayor sa siyudad, Gerald Anthony “Samsam” Gullas Jr., nga ipadayon niya ang nasugdan nga suporta nga gihatag sa iyang apohan nga si kanhi mayor Eddie Gullas ngadto sa kapulisan.