UNSAY mahitabo sa mga eskolar ubos sa Paglaum scholarship grant sa kagamhanan sa lalawigan sa Sugbo sa bag-ong administrasyon ni Gobernador Gwen Garcia?
Matod sa gobernador, kinahanglan pa kini niya tun-an, aron dili madudahan nga dunay gipalabi ug gigamit sa pamulitika.
“Kay ang ato man lang gud ani, kon magpili man lang ta sa panagaan nato og mga scholarships, kinahanglan clearly defined ang proseso, unya clearly defined ang qualifications. Kay aron dili ta masuspetsaan nga gigamit lang ni nato para pamulitika,” sigon ni Garcia.
Si kanhi bise gobernador Agnes Magpale ang kanhi nagdala sa Paglaum Scholarship isip maoy co chair sa Provincial Women’s Commission.
Alang sa school year 2019, dugang 300 ka slots ang gibuksan sa Kapitolyo alang sa Paglaum Scholarship, gawas pa kini sa 1,375 ka scholars nga unang nakabenepisyo sa program.
Ang Cebu Provincial Government nitagana og P20 milyones alang sa mga panginahanglan sa iyang mga Paglaum scholar.
Niadtong Agusto 2016, giaprobahan sa Sangguniang Panlalawigan ang ordinansa alang sa Paglaum diin si Magpale ang nagpanday niini.
Ang eskolar ubos sa Paglaum makadawat og tuition fee assistance nga P10,000 ug binuwan nga allowance nga P1,500.
Apil sa mga benepisyaryo niini ang labing kabos nga mga estudyante; mga biktima sa krimen sama sa lugos, human trafficking, drug abuse ug uban pa; mga anak sa drug dependents, nabungkag nga pamilya, solo parents ug kadtong namatay na ang mga ginikanan.
Niadtong Hunyo 3, 2019, gisugdan sa PWC ang pag-interview sa mga aplikante, tulo ka semana kapin sa dili pa molingkod ang bag-ong set sa mga opisyal sa kagamhanan sa lalawigan sa Sugbo.
Sumala ni Garcia sa iyang unang miaging administrasyon, dunay ordinansa alang sa katukoran sa Cebu Tertiary Education Assistance Program (CTEAP).
Kini nga scholarship program gipundohan sa Provincial School Board nga naghatag og libre nga tuition ug miscellaneous fees sa mga gradwado sa high school nga nasakop sa top 10. (SCG)