PAGPANAKOP sa mga magmotorsiklo nga di magsul-ob og helmet nga moagi sa kadalanan sa Dakbayan sa Talisay estrikto na nga ipatuman sunod semana.
Kini maoy gitug-an ni Jonathan ‘Joy’ Tumulak, pangulo City of Talisay-Traffic Operation and Development Authority (CT-OSTODA).
Gawas sa di mag-helmet, dakpon usab ang magsobra sa duha nga magsakay sa motorsiklo.
Sa paglingkod ni Talisay City Mayor Gerald Anthony ‘Samsam’ Gullas, ang pagsulbad sa problema sa trapiko usa sa anaa sa iyang 8-point agenda.
Usa sa pagtubag sa maong problema ang estrikto nga pagpatuman sa balaud sa trapiko.
Usa sa nakapaaghat ni Tumulak nga unahon ang estrikto nga pagdili sa mga wa nag-helmet nga motorista, driver o angkas, mao ang disgrasya sa dalan niadtong Hunyo 27.
Sa may Cebu South Coastal Road, nabanggaan sa laing motorsiklo ang laing motorsiklo, kansang drayber way helmet.
Ang pagkaigo sa iyang ulo ngadto sa gutter nakita diha sa closed-circuit television (CCTV) camera.
Gituohan nga kini maoy hinungdan sa iyang hinanali nga kamatayon.
Si kinsa kadtong masikop maisyuhan og citation, diin magbayad sila og tag P300 matag sikup.
Gitinguha usab karon ni Tumulak nga i-rekomendar sa Konseho nga patas-an ang multa ngadto na sa P500 o P1,000.
Nakig-alayon na usab sila si Tumulak ngadto sa Land Transportation Office alang sa pag-isyu og Temporary’s Operators Permit (TOP).
Di lang una ibutyag sa CT-TODA kon kanus-a nga adlaw sa sunod semana sugdan aron magsugod na sa pagdisiplina sa mga motorista.
“Daghan pa nga mga traffic rules ang strikto nato nga ipatuman. But mag-una ta sa wearing of helmet gyud kay mao ni sagad nga makita gyud nato, nga rampant nga violation sa national law kalabot sa trapiko,” pasabot ni Tumulak sa Superbalita Cebu.
Sugod usab sunod semana, estrikto usab nila nga idili ang overloading sa mga motor.
Sikupon usab kadtong molapas sa duha (driver ug usa ka angkas) ang nagsakay sa motorsiklo.