HELLO mga higala. Musta na? Grasya ni Lord, ania, buhi pa pod ko luyo sa hagit nga ginaagian sa pamilya namo.
Bisan asa daghan kaayog pwedeng mahitabo, higala. Nindot god unta kung andam kita pirmi apan in reality, dili gayud ta kalikay niini.
Kining grabeng kasakit makapahilum ug makapahunong diay kanato sa bisan unsa natong mga buluhaton. Sama sa gisaysay nako naidtong ning aging Sabado, napuno og kasakit ning flat nga dughan nako.
Sa pagkatinuod hangtod karon, wala pa gihapon koy nakaplagang solusyon apan ninggaan gamay ang kabug-aton sa akong dughan pinaagi sa grasya sa Kahitas-an.
Diri sa kalibotan ba, dili lamang mga tawo ang makapalabad sa atong ulo apan ang mga dautang ispiritu. Mao gayud ning giingon sa Bibliya sa mga taga-Efeso 6:12: “nga ang atong pakigdumog dili batok sa mga binuhat nga unod ug dugo, kon dili batok sa mga dautan nga mga espiritu.”
Ang pangutana, sure ba kaha kita nga dili pod kita ang hinungdan sa problema? Hinukluban nato kini kay lisod mamasangil sa uban unya kita man diay ang hinungdan.
Sa tinuod lang, nagsaysay ra ko sa akong ginaagian. Kung kinsay sayop sa sitwasyon, giluhod na nako sa Ginoo sa makadaghan, igsuon.
Sa paglahutay, usa ang musika sa akong ginapasalamatan sa Dios. Gani, ang titulo nato nga, “song in the night,” kay literal nga mga kanta nga akong ginaawit kay dili man ko katulog sa kabalaka.
Ambot kung unsa pod ang inyong mga pamaagi apan kanako, ang pagbaktas-baktas sa kadalanan, pag-ampo ug pag-awit alang sa atong Dios nga gamhanan ang akong ginasaligan. Dili god lohikal apan mas epektibo kini nga solusyon alang nako, igsuon.
Una, ang pagbaktas nindot nga ehersesiyo kay tungod ani ang atong utok nagapagawas og mga kemikal nga maka “happy” sama sa endorphin, oxytocin, serotonin ug dopamine. Way medisina nga paliton, baktas o simpleng ehersisyo lang, epektibo ng makapakalma kanato, igsuon.
Ikaduha, ang pagkanta ilabi na kung pagdayeg sa Ginoo bisan yabag, migo dili lamang nindot nga ehersisyo sa baba ug baga apan pangpalig-on pod sa pagtuo nato sa Ginoo. Sama sa Bible story sa “Wall of Jericho” nga nahugmak ang pader tungod lang sa pag-ampo ug pagdayeg sa Ginoo.
Ang kinaulahian, apan una nakong solusyon mao ang pag-ampo sa Diyos nga Gamhanan. Dili na makiglalis kung kay kinsang sipyat kay ang Dios ang magahatag og hustisya bisan human sa kamatayon ta kay ang konsekwensya sa atong mga desisyon ato gayud pagatagamtamon.
-oOo-
Condolence sa pamilya ni Tatay Renato “RENE” Lumawag nga ningbiya na dinhi sa kalibutan karong semanaha lamang. Ang Ginoo magaling-on unta sa imong pamilya sa ginaagian nilang kasakit sa imong pagbiya. We will miss you, Tay, Rene.