Makalingkawas na gyud nga grabeng trapiko ang mga motorista ug manakayay nga muagi sa Barangay Tabunok, dakbayan sa Talisay padung sa ilang trabahoan o balay.
Kini human gipasalig sa Department of Public Works and Highways (DPWH) ug iyang kontraktor nga paspasan ang pagtrabaho sa Mananga Bridge 2 sa Barangay Tabunok ug hingpit nga magamit na kini sa Agusto 4, 2019.
Kini ang gipasalig atol sa gihimo nga pakigpulong ni Talisay City mayor Gerald Anthony "Samsam" Gullas Jr., mga representante sa DPWH, ang kontraktor sa proyekto ug ang pangulo sa City of Talisay Traffic Operations Development Authority (CT-TODA) Joy Tumulak niadtong Biyernes, Hulyo 5.
Gihimo usab ang tigum human usab nga nasuta nga molahus gyud sa Talisay City ang himuon Regent Aguila Ironman 70.3 Triathlon nga ipahigayon karong Agusto 11 diin ang dul-an 11 ka kilometro sa dalan diha sa Cebu South Coastal Road ang masirad-an gikan sa alas 5 sa buntag hangtud sa alas 12 sa udto ug walay laing kaagian ang mga motorist kun dili sa national highway lang.
Ang maong pagpatrabaho sa Mananga Bridge 2 ang gikatakda unta nga mahuman niadtong Marso ning tuiga pa, apan giingon nga tungod sa pipila ka problema nga giatubang sa kontraktor, sama sa mga ekipo nga gigamit hinungdan nga nilanat og pipila pa ka bulan.
Sa pagkakaron, ang habig sa taytayan nga pa-habagat ang nagpabiling abli sa mga motorista.
“Kon maablihan na gyud ang Mananga Bridge, wala tay problema sa traffic sa highway. Kon dili mahuman ang Mananga, problema gyud na siya kay dili mahimo pasugaton namu ang mga dagko nga sakyanan, diha lang sa usa ka site,” pagpasabot ni Tumulak sa Superbalita Cebu.
Samtang, gitug-an ni Tumulak nga mao kini ang nasabutan atol sa gihimo nga unang tigum sa mga lokal nga kagamhanan sa Lapu-Lapu, Mandaue, Cebu ug Talisay niadtong Huwebes, Hulyo 4.
Diin nasabutan nga ang bike event ang moagi sa South Road Properties sa siyudad sa Sugbo lahus na sa CSCR sa siyudad sa Talisay, ug dili parehas sa niaging tuig nga kutob ra sa siyudad sa Mandaue ang kalihukan sa Ironman. (FMD)