INAY nga triathlon, nahimo na lamang nga duathlon ang Penong’s 5150 Davao nga himuon karon dinhi sa dakbayan sa Davao.
Sabado, Hulyo 6, mipaguwa og advisory ang organizers nga nagpahibawo nga wala nay lumba-langoy tungod wa kapasar ang kalidad sa tubig sa may Waterfront Insular Hotel, asa himuon ang lumba langoy nga 1.5km ang gilay-on.
“Upon further investigation, there is some concern with regards to the quality of water of the swim course. We recently conducted comprehensive water testing and the results reflect that the water is not currently suitable for recreational use,” subay sa pahibalo nga nakapost sa Penong’s 5150 Davao Facebook page.
Gidugang sa Sunrise Events nga maoy nangunay sa teknikal sa kompetisyon nga human sa pakigkonsulta nila sa mga health officials, nakadesidar silang ikanselar ang lumba langoy alang sa kaluwasan sa mga partisipante nga maoy nag-una nilang gihatagan og pagtagad.
Tungod niini gihimo na lamang nga duathlon ang format sa kompetisyon.
Nasayran nga semana una ang kompetisyon, nagsige na ang serye sa ilang water test, diin ang labing uwahi gihimo niadtong Huwebes ug gahapon sa buntag miguwa ang resulta.
Gidugang sab sa tigpamaba sa Penong’s nga si JJ Sarona nga wala say refund nga mahitabo ngadto sa mga partisipante sa langoy.
Niya, nahitabo sab ang sama niini nga insidente bisan sa ubang kompetisyon sa abroad.
Tungod sa maong kakulian, mihimo og bag-ong race course ang organizers.
Sa 5150, inay nga lumba-langoy, gihulipan kini sa 2.5km nga dagan, samtang ang bike pabilin sa 40km ug dagan (run) nga 10 km.
Sa Sprint may race course na kini nga Run (1.25km), Bike (20 km) ug Run (5 km).
Sa 524 ka partisipante, 471 niini misalmot sa 5150 samtang 53 sa sprint.