KIDAPAWAN CITY -- Patay ang anak sa kanhi gobernador sa Maguindanao ug lain pang upat ka mga kaubanan niini human giingong wa nihunong sa checkpoint ug unang nipaarak sa ilang mga armas ngadto sa mga awtoridad.
Ang insidente nahitabo alas 8:45 sa gabii niadtong Biyernes, Hulyo 5, sa Army/Cafgu checkpoint sa North Cotabato.
Gikompirma nga si Datu Hassem Matalam, anak ni kanhi Maguindanao Province governor ug Pagalungan Mayor Norodin Matalam ang napatay.
Samtang ang laing upat nga namatay nga kauban ni Matalam mao sila si Botod Concon, molupyo sa Matina, Pangi, Davao City; Alex Sanduyugan, molupyo sa Barangay Rajahmuda, Pikit; Ganto Pasandalan, molupyo sa Barangay Tinutulan, Pikit ug Abdullah Nunguan, Pikit.
Nasayran gikan kang 602nd brigade commander Brigadier General Afredo Rosario nga sakay ang mga napatay sa Nissan Patrol gikan sa Pikit sa nahisgutang probinsiya ug pauli na unta sa ilang balay sa Barangay Layog, Pagalungan.
Apan pag-abot nila sa Army/Cafgu/BPAT checkpoint sa Barangay Inug-ug Pikit wa nihunong ang ilang gisakyan ug nagpabuto pa sa ilang mga armas.
Napugos og balos ang mga sundalo ug Cafgu sa pagpabuto hinungdan sa ilang kamatayon.
“The troops manning the checkpoint tried to stop them for inspection but they opened fire first, which led to our men to fire back,” suma ni Rosario.
Dugang ni Rosario nga nagpatuman sila og hugtanon nga seguridad gumikan sa kagubot karon sa Pikit tali sa magkaaway nga lider sa Moro Islamic Liberation Front (MILF).
Narekober sa sakyanan ni Matalam ang mga tag-as nga matang sa armas ug mga granada.
Apan pamilya ni Matalam nagsulti nga maayong tawo ang namatay ug wala malambigit sa mga ilegal nga trabaho.
Padayon pang giimbestigahan sa kapulisan sa Pikit Municipal Police Station ug 602nd Brigade, Philippine Army ang maong hitabo.