SUSIHON sa konseho sa dakbayan sa Talisay kung kailangan ba palapdan ug pahugtan ang kasamtangan ordinansa nga nagmando sa tanang mga establisemento sa siyudad nga pabutangan ug close-circuit television (CCTV) camera sa ilang mga lawak.
Giangkon ni Talisay City Vice Mayor Alan Bucao nga tuig 2010 pa na-aprobahan ang maong ordinansa apan wala kini napatuman ug estrikto.
Base sa City Ordinance No. 2012-02, mga tigpatigayon sa dakbayan sa Talisay gikinahanglan mutaod ug CCTV sulod sa ilang establisemento isip rekisitos sa pag-renew sa ilang business permit.
Hinuon gitug-an ni Bucao nga aduna gyud usab mga establisemento ang nituman.
Sa pagpa-review nila sa maong ordinansa sa ilahang umaabot nga session karong Martes, Hulyo 9, 2019, susihon nila sa konseho kon unsa nga mga provision niini ang angay nga bag-ohon o i-amendar.
Kini sama nalang usab sa pagpa-upgrade kalabot sa klase sa camera, pila ka adlaw o semana nga kinahanglan anaa gihapon sa storage ang kuha sa CCTV.
Kini aron dali nga magamit kon ugaling adunay mga disgrasya o kremin nga mahitabo nga gikinahanglan ang kuha sa CCTV sa usa ka establisemento aron sa pagtabang sa pagsulbad sa kaso.
Dugang niya nga kon busy sila kaniadto sa pagpanday og mga balaod sa mga niagi nga mayor, ila na nakita nga mas busy pa sila karon sa pamunuan sa batan-on pa nga mayor nga si Gerald Anthony "Samsam" Gullas.
“Dili man siguro tanan maatiman sa mayor, kay daghang angulo ang gitan-aw sa mayor, so usahay mo-depende na. We are ready now sa council nga we will be busier with this mayor, kay very specific siya, kita siya sa importance of these ordinances,” pagpasabot ni Bucao.
Kahinumduman nga aling balaud nga gustong’ hugot nga mapatuman ni Gullas sa Talisay City, mao ang plastic ban, nga giangkon usab ni Bucao nga anaa nay balaudnon niini, apan wala lang hugot nga napatuman. (FMD)