MOBALHIN si All-Star Kawhi Leonard sa Los Angeles Clippers aron makig-uban sa laing All-Star nga si Paul George alang sa sunod season sa National Basketball Association (NBA).
Mao kini ang gibutyag sa kasaligang tinubdan sa AP News, kinsa dili gustong magpaila gumikan kay paingon pa’ng i-finalize kining maong mga kasabutan ning pagsuwat.
Si George makuha sa Clippers gikan sa Oklahoma City Thunder pinaagi sa trade diin upat ka first-round picks ang mabaylo kaniya.
Dihang nasayran ni Leonard kining maong kalambuan, hayan nakadesisyon kining motapon sab sa Clippers.
Gawas sa first round picks, makuha sab sa Thunder gikan sa Clippers sila si Shai Gilgeous-Alexander ug Danilo Gallinari.
Daghan ang nakugang sa desisyon ni Leonard gumikan kay dili pa lang dugay nga iyang natuboy ang Toronto Raptors sa labing una niining titulo sa NBA diin siya ang napiling Finals MVP.
Mao kini ang labing unang higayon sa kasaysayan sa NBA nga ang kasamtangang Finals MVP mitapon dayon og team human sa usa ka season.
Gibuhat sa Raptors ang tanan aron madani si Leonard nga magpabilin apan wala kini mosaler.
Nagtinguha sab unta ang Los Angeles Lakers sa pagkuha kang Leonard apan pakyas sab.
Gumikan sa salary cap, ang labing dakong matanyag sa Clippers ngadto kang Leonard mao ang upat ka mga tuig nga kontrata nga nagbalor og $142 million, nga gingong giuyonan na sa three-time All-Star.
Si Leonard usa lang sa tulo ka mga magduduwa nga nakakuha og Finals MVP awards sa duha ka managlahing teams. Nakaangkon sab siya ning maong pasidungog dihang nagduwa pa siya sa San Antonio Spurs.
Naila sa iyang pagkahilumon, si Leonard gikonsiderar nga usa sa labing maayong magduduwa nga kuyaw sa opensa ug hasta sa depensa.
Nag-edad pa lang og 28 si Leonard ug daghan pa kini’g ikabuga.
Sama ni Leonard, daghan pa sab og ikabuga si George, kinsa nag-edad pa lang og 29.
Sa paghiabot nila ni Leonard ug George, dili ikalimod nga ang Clippers usa na sa gikonsiderar nga title contenders sa sunod nga season.
Human nila nasayri ang desisyon ni Leonard, ang Lakers wala mag-usik og panahon ug nihimo dayon kini’g lakang aron makabira og magduduwa nga makatabang sa ilang superstars nga si LeBron James ug Anthony Davis.
Nakuha sa Lakers ang laing pambato sa Toronto nga si Danny Green, kinsa mao mismo ang mianunsyo nga mobiya sa Raptors aron motapon sa Lakers.
“Kawhi has made his decision. Seems like the announcement is out,” matod pa ni Green.
“It’s time for me to make my announcement ... I will be teaming up with new teammates in LA, the Los Angeles Lakers.” AP, ESL