NAGHISGOT na ko aning panginahanglan sa estriktong pagpatuman sa mga balaud sa traffic sa Metro Cebu. Kanang di lang kay usa o duha ka mga enforcer ang mopatuman, kon di tanan.
Nagduso ko ani tungod kay mao ra ni nga paagi nga maluag luagan ang kahuot sa trapiko. Gawas man gud nga huot ang karsada, daghan ang mga abusado. Usa ani kaning mga sakyanan nga mo-counterflow, motorsiklo man o four-wheel.
Maayo unta hugtan ang pagpatuman niini kay dako na man og multa. Not necessarily nga sakmiton ang sakyanan ug i-impound. Ang pagpamulta igo na kaayo nga deterence aning mga tawhana.
Unta usab idili ang mga parking sa highway. Mangu og patuman unta niini ang mga local government unit (LGU) gikan sa Dakbayan sa Mandaue ngadto sa Dakbayan sa Danao. Mag-unsa man ang road expansion kon ang mga LGU di magpakabana? Unta usab ang Department of Public Works and Highways (DPWH makigtambayayong sa mga LGU alang niini.
Kapila na man gud ko mosikad sa northern Cebu road ug mao ni ang akong makit-an. Gikan sa Cabancalan ngadto sa eskina sa Tipolo. Kana sang gikan sa lungsod sa Consolacion ngadto sa Danao City. Wa ni maka create og traffic kay sayo sa buntag, apan posibleng makaingon sa disgrasya.
BIKE LANES
Sa giplanong mga expressway, hinaut pa unta nga dunay bike lanes nga ipamutang. Kay duna na may alternatibong lapad nga karsada gikan sa Dakbayan sa Naga sa south padung sa Danao City sa north, gipaabot nga di na maghuot ang mga sakyanan sa daan nga highway kay ari na agi sa expressway ang ubang mga sakyanan.
Niini, ang one-meter shared nga lanes sa duha ka mga side, mabutang na unta. Di na mi makuyawan nga mosikad kay naa na may lane alang namo. Kana ra bang Sabado ug Dominggo, daghan ang magpanon sa norte aron magpasingot og sikad.
Sa ubang mga dapit sa Pilipinas, sama sa Iloilo, naa silay dedicated bike lanes.
GIPALABI
Tan-awa ang atoang mga highway, gipalabi ang dagkong mga sakyanan. Gitugtan pa sa pag-park ang mga truck. But pila na man ka mga aksidente sa dan nga nakapatay tungod sa gi-park nga sakyanan nga wa makita?
Kadaghan na ba sa mga reklamo sa mga netizen sa traffic pero way nabuhat ang kagamhanan. Unta aron pag-encourage sa pagsikad, naay bike lanes samtang ang malls magbutang og bike racks nga dunay mga atop aron di mauwanan ang biseklita, nga usahay, mas pinangga pa sa asawa.
Kanus-a pa man kaha kita makasugat og lider nga ang panghuna-huna di kinaraan, kanang moderno. Hinaut ang bag-ong mga lider mahigmata na.