AMBOT og unsay nakaon ug nasulod sa utok ni Lapu-Lapu City Mayor Junard ‘Ahong’ Chan nga na-usab man ang iyang huna-huna. Human siya midaog batok ni Arturo ‘Boy’ Radaza, iyang gipahibawo nga dili dayon ni taktakon ang mga empliyado sa kanhi administrasyon bisan co-terminus, contractual ug job order employees. Ang mga co-terminus (kadtong dungan unta nga mokanaog sa mayor), dili dayon ipa-resign hangtod makadawat sila og notisya gikan kaniya.
Matod pang Ahong nga iya unang hatagan og kahigayonan ang maong mga empliyado nga malugwayan ang ilang pagserbisyo og usa o duha ka buwan. Atong gidayig ang saad ni Ahong sa ingon nga makapangandam usab ang mga apektadong empliyado kay dili baya lalim karon ang mangita og trabaho. Kasagaran sa mga job order kadto intawong dili professional.
Matod pa ni Ahong nga sulod sa duha ka buwan, ipa-ubos sa evaluation ang maong mga empliyado kon angayan ba sila nga i-rehire o tangtangon, depende sa ilang performance ug rekomendasyon sa ilang department heads. Apil sa iyang gisaad nga dili niya tangtangon ang mga persons with disability (PWD) nga naka-trabaho panahon sa administrasyon ni Mayor Paz Radaza. Gani pun-an pa kini niya kay kining maong mga tawo maoy nagkinahanglan og panabang kay dili dayon makapangita og trabaho gumikan sa kakulian sa ilang panglawas.
Apan unsa bang pagka-unsa nga wala man tumana ni Ahong ang saad. Kay niadtong Hulyo 1, sa unang adlaw sa iyang pag-asumir, daghan ang naghilak sa pagka-hapon gumikan kay gitangtang na sila. Nakadawat na sila og termination paper ug pa-aplayon og balik. Asa na diay tong iyang gisaad nga duha ka buwan nga lugway?
Admitido na man nang ubang mga empliyado labi pa ang mga supporters ni Radaza nga maapektuhan sila kay naa man usay mga tawo si Ahong nga iyang i-kulukar. Pero mas maayo nga wa na lang unta siya mosaad nga lugawayan ang ilang pagtrabaho aron makahimo sila og lakang dayon niadtong pagkahuman sa ilang kontrata o appointment. Mahulog ni sa kanta nga ‘Gihimo ang saad aron lang pakyason’. Pagkatoytoy!(bobbygnalzaro@gmail.com)