LOVE triangle ang nag-unang motibo nga nakita sa kapulisan sa Dakbayan sa Lapu-Lapu sa pagpatay sa usa ka maestro niadtong Biyernes sa gabii, Hulyo 5.
Nasuta sa ilang imbestigasyon nga duna kini kapuyo nga babaye nga duna say kanhi kapuyo nga usa ka seaman.
Si Alfredo Amit, 30 kapin, kinsa gipusil sa wa mailhing mamumuno, magtutudlo sa Buaya Elementary School.
Si Amit kasamtangang nagpuyo sa Sitio Abapo, Brgy. Mactan, Dakbayan sa Lapu-Lapu.
Siya lumad sa Brgy. Talima, isla sa Olango, apan kasamtangang nag-abang og kapuy-an sa Brgy Mactan.
Matod ni Police Major Miguel Andeza, hepe sa Mactan Police Station, nga base sa ilang inisyal nga imbestigasyon, si Amit giingong padulong nang mopauli sa iyang giabangang boarding house dihang giatangan sa mamumuno.
Giingong ang balay ni Amit layo og gamay gikan sa karsada hinungdan nga naglakaw ra siya human nikanaog sa gisakyang motorsiklo.
Samtang naglakaw duol sa iyang giabangang balay, wa maihing tawo nipusil kaniya.
Matod ni Andeza nga sa kakalit sa hitabo, way nakabantay kon pila ka mga tawo ang killers.
Buto sa armas de fuego lang ang nadungog sa mga tawo sa palibot. Wa usay nakabantay kon nagmotorsiklo ba o naglakaw ang killer.
Nakaangkon og samad pinusilan sa dughan si Amit hinungdan sa iyang pagkahagba.
Dali siyang gidala sa tambalanan sa mga tawo sa dapit, apan nakabsan sa kinabuhi.
Na-recover sa crime scene ang duha ka mga empty shell sa gituohang kalibre 9mm nga pistola.
“Wa pay klaro kay wa pa ta kita og witness. So far, puro ra ni speculation atoa,” matod ni Andeza.
Sa inisyal nga imbestigasyon sa kapulisan, love triangle ang ilang gitutokang motibo sa pagpamusil.
Nasuta sa kapulisan nga adunay kapuyo si Amit nga taga isla ra usab sa Olango. Apan ang babaye giingong aduna usay mga anak sa usa ka seaman.
Gisusi pa usab sa kapulisan ang background sa biktima sa tunghaan diin siya magtudlo.
Apan sa inisyal nila nga impormasyon, wa usab kini gikaaway o makahisgot nga adunay hulga sa iyang kinabuhi.
“Ang mga bata naa sa Olango sad kuno sa babaye. Pero silang duha naa nag-ipon-ipon karon diha sa Mactan. Wala gyud ni kontra kay maayo man ning tawo. Mao possible babaye ang hinungdan ani,” matod ni Andeza sa Superbalita Cebu.