SA Agusto 4 mahimo nang maagian ang Mananga bridge human nipasalig ang contractor nga maayo na kini.
Duha ka problema ang masulosyunan, paghuot sa trapiko atol sa Ironman 70.3 karong Agusto ug trapiko nga kada adlaw nga giproblema sa mga motorista nga moagi sa national highway nga molatas sa mao nga taytayan.
Gipasalig sa kontraktor nga nagtrabaho sa taytayan nga sa Agusto 4 mahuman na ang pagpatrabaho sa parte niini nga agian sa mga sakyanan nga padung sa amihanan sa Sugbo.
Ang pasalig gihimo atol sa pakigpulong ni Talisay City Mayor Gerald Anthony Gullas, representante sa Department of Public Works and Highways (DPWH), kontraktor ug pangulo sa City of Talisay Traffic Operations Development Authority (CT-TODA), Joy Tumulak, Biyernes, Hulyo 5.
Gihimo usab ang tigum human nasuta nga molahos sa Talisay City ang rota sa tinuig nga triathlon karong Agusto 11.
Dul-an sa 11 ka kilometro sa dalan sa Siyudad sa Talisay sa habig sa may South Road Properties (SRP) ang sirad-an, gikan sa alas 5 sa buntag hangtod sa alas 12 sa udto.
Way laing kaagian ang mga motorista kun di highway lang.
Gitug-an ni Tumulak nga mao kini ang nasabutan atol sa unang tigom sa mga lokal nga kagamhanan sa Lapu-lapu, Mandaue, Cebu City ug Talisay, niadtong Huwebes, Hulyo 4.
Nasabutan sa tigom nga ang bike event moagi sa Cebu South Coastal Road sa siyudad sa Sugbo lahos na sa Talisay City.
Di kini parehas sa miaging tuig nga kutob ra sa Mandaue City ang kalihukan sa Ironman.
Sa pagkakaron, ang habig sa taytayan nga pa-habagat ang abli nga gisaw-an sa mga sakyanan nga pa-north ug pa-south.
“Kon maablihan na gyud ang Mananga, wala tay problema sa traffic sa highway. Kon dili mahuman ang Mananga , problema gyud na siya kay dili mahimo pasugaton namo ang mga dagko nga sakyanan diha lang sa usa ka site,” pagpasabot ni Tumulak sa Superbalita Cebu.
Ang pagtrabaho sa Mananga bridge gikatakda unta nga mahuman niadtong Marso ning tuiga pa. Apan tungod sa pipila ka problema nga giatubang sa kontraktor, sama sa mga ekipo nga gigamit, nilanat og pipila pa ka buwan.
Samtang, dugang ni Tumulak nga mas sayon na ang pag-monitor sa mga mosalmot sa Ironman tungod sa mga closed-circuit television nga gipahimutang sa kadalanan ug ma-monitor sa command center.