MOKABAT sa 11,000 ka mga drayber sa Public Utility Jeepney (PUJ) sa Central Visayas ang makapahimulos niining “Tsuper Iskolar” program sa Technical Education and Skills Development Authority (TESDA) ug sa Department of Transportation (DOTr).
Di lang kay sila ra ang makapahimulos niini, lakip ang ilang dependents o mga benepisyaryo makahimo sa pagpaubos sa training.
Hulyo 5, Biyernes, dihang hingpit na nga gilusad sa Tesda ug DOTr ang scholarship program sa Central Visayas.
Mismo si Tesda Secretary Isidro Lapeña ang mihangop sa liboan ka mga drayber gikan sa Sugbo, Tagbilaran ug Dumaguete.
Si Lapeña nagkanayon nga ang programa parte sa Public Utility Vehicle (PUV) Modernization Program sa DOTr.
Tibuok nasod adunay P350 milyones nga budget nga gitagana sa Tesda alang sa skills training and assessment ug development of training regulations and curricula sa sektor sa transportasyon.
Samtang mag-training, magdawat pa sila og kwarta.
Ang matag scholar magdawatan og P350 matag adlaw alang sa 43 ka adlaw nga skills training kun P15,050.
Gipasabot ni Lapeña nga kining ilang gihimo paghatag ni og dugang kahanas sa mga drayber ingon man alang usab sa ilang pamilya.
Sa kinatibuk-an, adunay 34,000 ka PUV drivers, operators ang Central Visayas base sa datus sa Land Transportation Franchising and Regulatory Board (LTFRB) 7. (HBL)