SUPERBALITA DAVAO

Davin nangayo og pagsabot sa nahasol sa tulay

MAGSAYSAY, Davao del Sur -- Mapasalamaton ang amahan ning lungsod nga wa'y kinabuhing nakalas o naangol human mikalit og dako ang tubig baha sa Bulatucan River sa Barangay Poblacion niadtong Biyernes sa hapon, Hulyo 5.

Apan, nasubo si Mayor Arthur Davin human sa maong panghitabo diin nahanaw ang pinamalengke sa mga sakay niini lakip ang walo ka sakong bugas nga karga sa maong jeep.

Kini human naabtan og baha ang usa ka jeep nga mo-biyahe sa Barangay Tacul diin puno sa pasahero ug walo ka sakong bugas nga mao lang ang nangaanod.

Wa maunsa ang mga pasahero ug drayber sa jeep kinsa una ng mikanaog human nadaotan sa makina ang maong sakyanan nga mao ang natumba sa sapa ug nahaw-as sud sa pipila ka oras dihang gitabang sa mga ekipo sa munisipyo.

Daling nangayo og pagsabot si Davin sa kahasol nga nasinati sa iyang mga lumolupyo nga nagaagi sa sapa.

Gipasirad-an sa probinsyang kagamhanan ang maong tulay human gipailawom sa rehabilitasyon nga gipondohan og 10 milyones pesos.

Sa papanubay sa Sun.Star Superbalita, gisulti ni Davin nga nagpatabang ang lokal nga gobyerno human nadiskubri nga delikado na nga agian ang tulay mao nga midangop sila sa kapitolyo tungod kay usa kini ka provincial road.

Nasayran nga nakighinabi na sab ang mayor sa kontraktor sa tulay aron sulbaron ang suliran ug makakita og laing paagi nga di makaagi sa sapa ang mga sakyanan.

Apan, nasayran nga kuwang ang pondong 100 mil pesos alang sa paghimo og alternatibong dalan.

Mihimo sab ang lokal nga gobyerno og alternatibong dalan agi sa Crossing Malano, Bob ug lusot sa Barangay New Ilocos, apan, layo-layo ang tuyukan niini mao nga daghan ang molaktod sa pagtabok sa sapa.

Sa nahitabo, temporaryong di una paagian ang tulay sanglit itaod na ang "girder" sunod semana mao nga delikado kun paagian kini sa mga tawo.

Ang sapa maoy gihimong alternatibong agianan sa mga sakyanan nga upat ang ligid apan nabalaka si Davin sanglit di matagna ang panahon ilabi pa kun mag-uwan sa kabukiran.

"Mag-meeting mig utro karong alas 3:00 sa hapon (Dominggo) kay para mahatagan nato og aksyon kay nalooy ko sa atong katawhan," asoy sa mayor.

Si Davin midason nga mas tutukan nilang mapadali ang proyekto uban sa abag sa probinsya sud sa unom ka bulan aron hamugaway ug di na malangan ang mga lumolupyo ug ubang bisita nga naga-adto sa mga barangay sa ilang lungsod.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph