PIKIT, North Cotabato -- Wala misukol ug wala magpabuto sa ilang armas ang lima sa mga napatay sa Civilian Armed Forces Geographical Unit kon (Cafgu) Checkpoint sa Barangay Inug-ug Pikit, North Cotabato sa miaging gabii.
Kini ang gipamugos sa pamilya sa mga napatay nga dili shoutout ang nahitabo apan rubout.
Napatay atol sa checkpoint si Datu Haslim Matalam, anak ni kanhi Maguindanao Governor Norodin Matalam.
Nakabsan sab sa kinabuhi sila si Botod Concon, taga Matina Pangi, Davao City, Alex Sanduyugan, Ganto Pasandalan ug Abdullah Mamalumpong nga mga lumolupyo sa Pikit, North Cotabato.
Gibutyag ni Brigader General Alfredo Rosario, Army’s 602nd Brigade Commander nga nag pabuto sa ilang mga armas ug wala mihunong ang mga suspek sa highway checkpoint sa mga sundalo, Cafgu ug Barangay Peace Keeping Action Team (Bpat) sa Barangay Inug-ug.
Narekober sulod sa Nissan Patrol ni Matalam ang tulo ka M16 Armalite rifles, usa ka M653 rifle, .45 kalibre nga pistola, granada, rifle grenade, mga bala, shabu, 15,000 pesos nga kawarta ug mga drug paraphernalia.
Matud sa inahan nga si Pagalungan Maguindanao Municipal Councilor Noraisa Matalam nga buotan ang iyang anak ug possibleng ang laing upat ka napatay ang moaoy tag-iya sa mga armas nga nakuha sa sakyanan.
Hangyo sa pamilya sa mga napatay ang makatarunganon nga imbestigasyon sa Commision on Human Rights.
Sa pagkakaron, padayon ang gihimo nga imbestigasyon sa kapulisan og militar sa maong krimen.