NAGDUGANG og mga piyesa ang Los Angeles Lakers alang sa ilang tinguha nga mahibalik ang nawagtang nga kalig-on sa ilang puwersa alang sa ilang kampanya sa sunod season sa National Basketball Association (NBA).
Human nila nakuha si All-Star center Anthony Davis gikan sa New Orleans Pelicans, ang Lakers mibira sa laing kasaligan ug beteranong sentro nga si DeMarcus Cousins gikan sa free agency.
Gawas niini, gikuha sab og balik sa Lakers ang beteranong pointguard nga si Rajon Rondo aron makadala sa ilang timon sa duwa.
Nagkauyon ang Lakers ug si Cousins sa usa ka tuig nga kontrata nga nagbalor og $2.3 million.
Si Cousins, kinsa gihasol sa pagkaangol dihang nagduwa pa siya sa Golden State Warriors sa miaging season, kuhaon sab unta sa Miami Heat apan nakumbensir siya ni Davis ug pipila pa ka mga magduduwa sa Lakers nga motapon sa Los Angeles.
Kon wala siya’y angol, hayan makig-uban si Cousins nila ni Davis ug LeBron James sa pagporma og Big Three sa Lakers.
Si Cousins, kinsa usa ka four-time All-Star, sulod ra sa 30 ka mga duwa nakapakita og aksyon sa Warriors niadtong 2017-18 season gumikan kay naangol ang tiil niini (torn Achilles).
Sa bag-o lang nahuman nga 2018-19 season, nalimitahan lang si Cousins og walo ka mga duwa gumikan kay naangol na sab kini.
Sa iyang bahin, si Rondo miuyon sa duha ka mga tuig nga kontrata aron mobalik siya sa Lakers.
Dako unta og natampo si Rondo sa paggiya sa Lakers isip pointguard sa miaging season apan nalimitahan lang siya og 46 ka mga duwa gumikan kay naangol kini.
Ang 33 anyos nga beterano, kinsa mosulod sa iyang ika-14 ka mga tuig sa liga, nag-average og 9.2 puntos, 8.0 assists ug 5.3 rebounds isip usa ka Laker.
Gipangtapakan sa Lakers ang haw-ang sa ilang puwersa pinaagi sa pagpapirma og balik nila ni Kentavious Caldwell-Pope, JaVale McGee ug restricted free agent Alex Caruso unya ilaha sab nakuha si free agent guard Quinn Cook.
Opisyal sab gianunsyo sa Lakers nga mipirma na kanila ang three-point artist nga si Danny Green og duha ka mga tuig nga kontrata nga nagbalor og $30 million.
Si Green dako og kontribyusyon aron maangkon sa Toronto Raptors ang labing una niining titulo sa miaging season diin kaabag niya ang Finals MVP nga si kawhi Leonard.
Apan sama ni Leonard, mibalhin sab dayon si Green human sa usa ka season sa Toronto. Si Leonard mitapon sa Los Angeles Clippers. (AP, ESL)