LUYO sa mga kakulian, pagkatangtang sa swimming event tungod sa di maayong kalidad sa tubig-dagat asa himuon ang lumba-langoy, nagmalampuson sa kinatibuk-an ang labing una nga Penong's 5150 Duathlon Davao, kagahapon, Hulyo 7.
Kahinumduman nga gitangtang na lamang ang swimming event, sa triathlon event unta tungod wa kapasar ang kalidad sa tubig diha sa Waterfront Insular Hotel, nga gihulagway nga 'not suitable for recreational use.'
Ug aron mapadayon ang kompetisyon, inay nga lumba langoy, gihulipan og lumba-dagan sa managlahing distansiya alang sa pro ug sprint.
Sa male pro division, nanguna si Jakub Langhammer sa Czech Republic sa oras nga 1:46:00.
Ang 27-anyos nga atlelta, taud-taud na sab nga mipakita'g gilas sa nagkadaiyang isports, diin ang uwahi, nabutang siya sa ika-11 nga pwesto sa CZE Triathlon National Championships (Elite Men).
Misunod kaniya si Kieran Mcpherson sa New Zealand, nga miangkon sa oras nga 1:49:58 segundos.
Gisundan sab siya ni Mitch Robins sa Australia nga miharus sa oras nga 1:53:07, ug ikaupat ang pambato sa Pilipinas nga si August Benedicto sa oras nga 1:54:10.
Si Benedicto ang labing unang Pilipino finisher sa Ironman PH niadtong 2018 sa kompetisyon nga gihimo sa Subic Zambales.
Samtang sa female pro si Dimity Lee Duke sa Australia, maoy mi-reyna sa oras nga 2:02:10.
Una nanguna sa Penong's 5150 si Duke nangharus na sab og kadaugan isip 1st Overall Female Laguna Phuket 10.5km Run; 2nd Pro Female 70.3 Ironman Subic Bay Philippines; 6th Pro Female 70.3 Ironman Asian Pacific Championship Vietnam; 6th Pro Female Ironman North American Championship Texas ug
4th Pro Female 70.3 Ironman Davao Philippines.
Misunod sab niya si Laura Wood sa oras nga 2:09:02.
Ug ang mga mananaug sa Male Asian Elite Awards mao sila John Leerams Chicano sa Pilipinas sa oras nga 1:50:54, misunod niya si Raymund Torio (1:53:22); Jorry YCong (1:53:36); Juan Carlos Abad (1:54:35); Leonard Rondina (1:57:15) ug Andrew Kim Remolino (1:58:28).
Ang kompetisyon gimugna sa Penong’s Barbecue Seafood & Grill kapartner ang Sunrise Events nga mao say nanguna sa IronMan dinhi, aron ipromotar ang himsog nga panglawas.
Human gisundan sa Davao, plano sab nga ipahigayon kini sa Luzon ug Visayas.