UGMANG adlawa ang giatngan nga payout sa pipila ka mga investors sa Rigen Marketing nga giila na karon nga Rigen Wellness 2.0.
Kini human nga mipagawas og infographic nga "The Long Wait Is Over" sa Facebook Page niini.
Sa Hulyo 7 giingog mahitabo ang “All Branches Meeting” ug sa Hulyo 8, karong adlawa mao ang “All registered agents, sub-agents, and merchants’ meeting.”
Samtang, sa Hulyo 9, adlaw nga Martes, gikatakdang mahitabo ang "Massive disbursement of cash incentives/payouts."
Gi-awhag sab ang mga investors nga kanunayon ang pag bisita sa ilang page kay didto makita ang official venue sa payout.
Apan, matud ni Maricel (bansagon gipatago), 34-anyos nga taga Barangay 31-D, Roxas Extension, Davao City nga maayo unta kung makuha niya ang iyang gi-invest nga maoy halin sa yuta nga ilang nabaligya sa Governor Generoso, Davao Oriental.
"Maayo lang unta og matinuod kini, dili lang unta puro istorya ning Rigen, kay dili lang ako ang nakulbaan sa dangatan sa salapi, daghan og sama nako," ingon ni Maricel.
Positibo sab si Helen, 57-anyos nga taga Jacinto Street, Davao City nga mabalik gyud ang kuwarta nga iyang na-invest.
"Mosalig ko sa Rigen kay naka-payout naman gud ko ani, kaya lang ning bag-o na-delayed gyud. Hapit na magduha ka bulan ang akong ikaduha, wala nako ka payout, basin diay karong Hulyo 9 man ka ha?" ingon ni Helen nga nahinabi sa Superbalita, kagahapon.
Samtang, wala pa masundan sa Rigen ang ulahing pahibalo nga “The Long Wait Is Over”
Daghang investors nga naglaum nga makuha na ang ilang payout human nga nahugno gikan sa pag-invest sa pipila ka giingong 'investment scam' nga nanirado na karon diin nasikop ang mga founder ug CEO.
Luyo niini, nagpadayon ang imbestigasyon sa awtoridad sa pipila ka bugos nga mga investment schemes nga naggula karon sa Davao Region ug sa kasikbit nga rehiyon subay sa mandu ni Pangulong Rodrigo Duterte.