TUNGOD sa ilang pagkuha sa pawikan nga giilang endangered green sea turtle, tulo ka mga mananagat nasikop sa akto sa kadagatan sa isla sa Barangay Caohagan, dakbayan sa Lapu-Lapu niadtong Sabado, Hulyo 6.
Si P/Col. Genaro Sapiera, hepe sa Regional Maritime Unit (RMU) 7, niingon nga ang pawikan patay na dihang naabtan sa mga sakop sa 701st Maritime Police Station (Marpsta) ug Criminal Investigation and Detection Group (CIDG) Cebu Province.
Ang awtoridad niila sa mga dinakpan nga sila si Darami Radja, 50; Barayan Alim, 32; ug Julius Asamsa, 49; pulos nagpuyo sa Sitio Puntod, Barangay Mambaling, dakbayan sa Sugbo.
Sumala sa worldwildlife.org, hapit tanang species o klase sa pawikan ang giila nga endangered o nagkapuo na.
Ang International Union for the Conservation of Nature and Natural Resources (IUCN) nilista sa nag-unang 50 ka critically endangered animals sa nasod, lakip sa lima ka species o klase sa pawikan: ang Philippine forest turtle, hawks-bill sea turtle, green turtle, spiny turtle, ug ang frog-faced soft shell turtle.
Si Sapiera nagkanayon nga ang Marpsta ug CIDG 7 naghimo og seaborne patrol operation sa kadagatan sa Lapu- Lapu ug mga kasikbit nga mga isla sa Barangay Caohagan dihang nakasugat sa motorized boat nga gisakyan sa tulo ka mga suspek.
“While the team approached the said pump boat, they saw the suspects throw a turtle into the sea. That’s the time the team proceeded to the direction where it was thrown and found the dead floating turtle,” matod ni Sapiera.
Nasakmit usab sa awtoridad gikan sa mga suspek ang duha ka improvised spear guns o pana, duha ka improvised diving fins, ug duha ka face mask.
Ang pawikan nakaangkon og samad sa pana sa iyang balayan.
Dugang ni Sapiera, ang patay nang pawikan ilang gitunol sa Wild Life Bureau sa Department of Environment and Natural Resources (DENR) 7 alang sa documentation ug proper disposition.
Samtang, matod ni Hector Amancia, hepe sa CIDG 7, ang tulo ka mga suspek mag-atubang og kasong kalapasan sa Sec. 27 sa Republic Act 9147 o ang Wildlife Resources Conservation and Protection Act.
“The case will be filed this Monday (July 8, 2019) for violation of RA 9147,” matod ni Amancia.
Niadtong Mayo 26, 2019, usa ka 52-inch green turtle nakaplagan nga patay na sa lungsod sa Moalboal, Sugbo, diin ikawalo na kini nga patay nga pawikan nga nakit-an sa maong dapit sa miaging duha ka tuig. (Dugang ni WBS)