KAPIN sa 48 oras nga walay agas o hinay ang agas sa 7,000 ka mga konsumidor sa Metropolitan Cebu Water District (MCWD) human sa gihimong emergency repair sa treatment plant sa Abejo sa lungsod sa Consolacion.
Ang water interruption nagsugod niadtong Sabado, Hulyo 6, diin gisugdan ang maong pag-ayo sa treatment facility sa Abejo sa alas 11:00 sa buntag sa naasoy nga adlaw.
Apan hangtod kagahapon, Hulyo 8, nagpabilin kini nga wala pa maayo.
Matod sa tigpamaba sa MCWD, Charmaine Rodriguez-Kara, nga nag-divert na sila og water supply gikan sa laing mga supplier aron mahatagan gihapon kadtong apektadong mga konsumidor.
Lakip sa apektado nga konsumidor ang anaa sa mga lungsod sa Liloan, Consolacion, Mandaue City, Mactan Island, Lapu-Lapu City, Opon, Mabolo (lower portion), MJ Cuenco Ave, North Reclamation Area, Pier area, Carreta, M.J. Cuenco Ave., parte sa Lorega San Miguel, T. Padilla, Tejero ug parte sa Imus sa dakbayan sa Sugbo.
Nag-supply ang Abejo sa MCWD og 7,000 cubic meters matag adlaw.