PATAY ang gitouhang usa ka tulisan human gilusad sa kapolisan ang hot pursuit operation niadtong Hulyo 5 sa Barangay San Carlos, siyudad sa Valencia, Bukidnon.
Si Police Lieutenant Colonel Surki Sereñas, kinsa hepe sa Valencia City Police Station, niila sa napatay nga si alyan Notnot lumad nga taga Quezon, Bukidnon.
Sa inisyal nga imbestigasyon sa kapolisan, nasuta nga buntag niadtong adlawa usa ka Perly B. Larian ug Alejane C. Mijarse, mga hingkod ang edad ug empleyado sa Frontrow Direct Selling Company sa Valencia City, nagpatabang sa Valencia City Police Station ug nireklamo nga sila gitulis ug gitionan og pistola sa wala mailang suspek sa dalan Bonifacio St., sa maong siyudad.
Deretsong milusad og hot pursuit operation ang kapolisan ug usa ka kadudahang lalaki nga takdo sa deskripsyon nga gihatag sa mga biktima.
Samtang doulan na sa mga polis giingong kalit kining mipaharurot sa iyang motorsiklo paingon sa northeast nga bahin ug namusil sa mga nirespondeng kapolisan.
Nagukdanay pa ug niabot sa Barangay San Carlos ug samtang naa dapit sa diversion road, mibalos ang kapolisan sa pagpusil niini, hinungdan sa pagkaigo ug pagkahulog niini sa gisakyang motorsiklo.
Gidala pa ang suspek sa La Viñas General Hospital apan gideklarar kining dead on arrival.
Narekober sa kapolisan sa crime scene ang usa ka 9mm pistol, mga gamit sa kalibre .45 sama sa bala, Remmington, ug usa ka suzuki raider 150 nga motorsiklo nga walay plaka.
Nakuha sab sa posisyon niini ang mga personal nga gamit sa mga biktima lakip cash ug uban pang importanteng butang sulod sa bag. Lakip sab nakuha ang usa ka pakete sa gitouhang shabu.
Ang Valencia City Police Station miani og batikos human giingong naalaan lang ang biktima ug gikwestyon nganong gipatay kini deretso.
Apan si Sereñas nipasabot sa SunStar Superbalita Cagayan de Oro nga nasabtan niya nga normal reaksyon kini sa mga kabanay nga nasakitan sa hitabo.
"I understand sa ilang reaction apan kita sa kapolisan, wala tay gitago. Naay mga ebidensya nakuhaan siya og armas ug nakuha pa sa iyang posisyon ang mga gamit nga gikan sa mga biktima niya sa pagtulis. Kung dili pod siya guilty, dili siya mosibat ug makipinusila sa polis," matud ni Sereñas.
Gani dili lang ang duha ka mga babae ang nabiktima niini niadtong adlawa apan duna pay usa human lakip sa nakuha sa posisyon ang ID ug cellphone gikan niini.
Dugang niini nga bukas siya kanunay ug ilang buhatan nga imbestigahan sa hitabo. Daw nakalatid na daan kanila nga tungod kay anaa sila niini nga trabaho kondili makasohan, mapatay sa labina diha sa mga police operation.
Gani pag courtesy call pa lamang niya sa buhatan sa mayor sa Valencia, una na nga gisulti kaniya nga tabangan sila kay sagad nga kaso gakatala sa siyudad kining pagpanulis ug pagpangawat.