GITAKDANG ipatawag karong semanaha ilabi na karong adlawa, Lunes, ang tinugyanan sa Barangay Nazareth ug ang miyembro sa tennis club human nga dunay tensyon nga nahitabo niadtong Hulyo 5 sa Barangay Nazareth sa siyudad sa Cagayan de Oro.
Nasayran nga buot nga i-demolish sa tinugyanan sa barangay ang tennis court kay tukoran og multipurpose nga building.
Giklaro ni Antonio Resma Jr., sa City Legal Office, nga dili supak ang City Hall sa mga proyekto sa matag barangay apan angayang moagi og proseso.
"Mao to atong gipa-stop kay wala may demolition permit. Number two, ang property is sa City Hall ang tax declaration. Giklaro nato nga dili man ga-opposed ang city hall sa proyekto. Lugar sama atong multipurpose nga building pero naay proseso nga tumanon," matud ni Resma.
Nasayran nga dunay natigayong tensyon tali sa tinugyanan sa barangay ug miyembro sa maong tennis club human usab giingong dunay executive order gikan sa tsirman sa maong barangay aron nga ipapahawa na ang maong tennis court apan nibabag ang mga miyembro niini ilabi na nga walay mapakitang dokumento ang tinugyanan sa Barangay.
Gipamugos sa miyembro sa maong tennis court nga usa kini ka lakip sa open space sa San Isidro subdivision kaniadto ug walay katungod ang barangay nga mokuha niini.
Gitakdang magtagbo sa pinakasayo karong Lunes ang tinugyanan sa tennis club ug sa maong barangay aron nga magsinabtanay.